Таны яагаад ч хийж чадахгүй 10 хөдөлгөөн

Хүн бүрийн хийж чаддаг олон хөдөлгөөний хажуугаар бас яагаад ч болдоггүй зүйлүүд байдаг ажээ. Гэхдээ дүрэм байхад гажилт бас байдгийг мартаж болохгүй л дээ.

Өрөөсөн хөмсгөө өргөх

Хөмсгөө өргөх чадвар нь хувьслын үр дүн юм. Бабуин, мандрил болон капуцин сармагчингууд өрсөлдөгчөө сүрдүүлэхийн тулд хөмсгөө өргөдөг байна. Ихэнх хүмүүс нэг хөмсгөө өргөж чаддаггүй ч үүнд суралцаж болно. Ингэхийн тулд:

1. Нэг хөмсгөө гараараа дарж байгаад өрөөсөн хөмсгөө нөгөө гараараа өргө.
2. Толинд харж үргэлжлүүлэн сургууль хийж байгаад булчингийн ямар хөдөлгөөн хөмсөг өргөдөг болохыг тогтоо.
3. Энэ «механизм»-ыг олмогц гар оролцуулалгүй хийж үз. Нилээд дасгал хийсний дараа чаддаг болно.

Тохойгоо долоох

Хүмүүсийн 99% нь өөрийнхөө тохойг долоож чаддаггүй бөгөөд 90% нь энэ тухай сонсмогц туршиж үздэг байна. Зарим хүн үүнд суралцдаг гэнэ. Өдөр бүр 5 хүн тохойгоо долоох чадвараа Гиннесийн номонд бүртгүүлэхээр оролддог гэсэн шүү.

Чихээ хөдөлгөх

Чихээ хөдөлгөж чаддаг хүн тун цөөхөн байдаг. Учир нь, чихний булчингийн нэмэлт эсүүд тархины гол хэсэгт оршдгоороо нүүрний булчингуудаас ялгаатай. Эдгээр эс нь муур, сарьсан багваахай зэрэг амьтадтай харьцуулахад туйлын бага хэмжээтэй байдаг гэнэ. Гэхдээ чихээ хөдөлгөж сурах арга бий. Үүнд:

1. Өмнөхийн нэгэн адил чих хөдөлгөгч булчингуудыг олох хэрэгтэй.
2. Нүүр дүүрэн инээмсэглээд харвал чих чинь бага зэрэг дээшилж байгаа нь мэдэгдэнэ. Бас араа шүдээ чанга зуувал чихний булчин мэдрэгдэнэ.

Чихний булчинг хөгжүүлэхийн тулд энэ хөдөлгөөнүүдийг давтан хийгээрэй.

Хэлээ хамрынхаа үзүүрт буюу эрүүндээ хүргэх

Энэ чадвар эцэг өвгөдөөс өвлөгдөн ирдэг. Хүмүүсийн 10 орчим хувь нь ийм хөдөлгөөн хийж чаддаг гэнэ. Ялангуяа үе мөчний онцлог хөдөлгөөнтэй Элерса-Данлогийн синдромтой хүмүүс бүр ч сайн хүргэдэг гэнэ. Та ч бас туршаад үзэхэд гэмгүй. Үүний тулд:

1. Хэлээ шулуун шугамаар сунгаж өмнөө “цэг тавьж” үз.
2. Дээд уруулаа дээд шүднийхээ дагуу доош буулга.
3. Одоо доод уруулынхаа тусламжтайгаар хэлээ дээд уруулдаа хүргэж хамартаа ойртуул.

Хүн болгон ингэж чаддаггүйг санаарай.

Хэлээ бөөрөнхийлөх зэрэг бусад чадвар

Хэлээ бөөрөнхийлөх чадвар нь хүний давамгайлсан ба бүдгэрсэн генийг тогтоох нэг төрлийн шалгуур болж өгдөг байна. Гэхдээ ихрүүдийг судалсан туршлагаас үзвэл энэ чадварт удамшлын хүчин зүйлийн зэрэгцээ амьдралын орчин нөлөөлдөг болох нь тогтоогджээ.
Хүмүүсийн тэр бүр хийж чаддаггүй хэдэн үзүүлбэрийг сонирхоно уу.

Нүдээ анихгүйгээр найтаах

Найтаах үед уураг тархины төвөөс чээж, өрц, хүзүү, нүүр, нүд болон биеийн бусад “хаагддаг хэсэг”-ийн булчингийн ажиллагааг зохицуулж байдаг мэдрэлийн эсүүдэд мэдээлэл автоматаар очдог. Хэрэв та нүдээ анихгүйгээр найтаавал нүд чинь аяганаасаа бүлт үсрээд гарах болов уу, яах бол? «Домог сарниулагчид» телевизийн шоуны хөтлөгчид үүнийг туршиж үзэх оролдлого хийжээ.

Өөрийгөө гижигдэх

Хүн бүхэнд гижигтэй газар байдаг, үүнийг мэддэг ойр дотныхон чинь зөндөө л дамшигладаг биз дээ? Гэхдээ хүн өөрийгөө гижигдэж чадахгүй. Учир нь, тархины энэ хэсгийг хариуцдаг эс бидний хөдөлгөөнийг “урьдчилж мэдрээд” хариу үйлдлийг нь өөрчилж амждаг байна.

Хуруугаар хийх үзүүлбэр

Дунд хуруугаа зурагт үзүүлснээр нугалж гараа ширээн дээр тавь. Одоо эрхий, долоовор, чигчий хуруугаа өргөж үз. Болж байгаа биз? Одоо ядам хуруугаа өргө дөө! Болохгүй байна уу? Учир нь, дунд ба ядам хуруунаас бусад бүх хурууны шөрмөснүүд бие биеэсээ хамааралгүй оршдог. Энэ 2 хурууны шөрмөс холбоотой учраас л дунд хуруу дарагдсан үед ядам хурууг хөдөлгөж болохгүй байгаа юм. Ядам хуруу мэдээгүй болсон мэт сэтгэгдэл төрж байгаа биз?

Хөлийн илбэ

Та нэг дор хэд хэдэн хөдөлгөөн хийж чадах уу? Туршаад үз дээ. Сандал дээр суугаад баруун хөлөө өргөж цагийн зүүний дагуу эргүүлэн тойрог зураарай. Мөн энэ зуураа баруун гараараа 6-ийн тоо бичээрэй. Юу болов? Хөл чинь чиглэлээ өөрчилж орхив уу? Дараа нь баруун хөлөө цагийн зүүний эсрэг эргүүлэнгүүтээ баруун гараараа 8-ын тоо бичээд үзээрэй.
Өөр нэг илбэ: 2 гарынхаа долоовор хурууг цагийн зүүний дагуу эргүүл. Эхлээд аажуухан, дараа нь хөдөлгөөнөө хурдасга. Хурдан хийж чадвал удалгүй 2 хуруу чинь эсрэг зүгт хөдлөх вий.

Хүн амьсгалаа хир удаан түгжиж чадах вэ?

Хүн усан дотор ам, хамраа чимхэж байгаад хуурай газар дээр байгаасаа 2 дахин удаан хугацаанд амьсгалаа түгжиж чаддаг ажээ. (рекорд нь 10 минут) Гэхдээ шумбагч Стиг Северинсен гэгч хүн 22 минут амьсгал авалгүй тэссэн гэдэг. Жирийн хүн хуурай газар 30 секунд, усан дор 2 минут амьсгалаа түгжиж чаддаг байна.