ТАНИЛЦ: Хар тамхины эсрэг дараах ажлуудыг хийхээр боллоо

Засгийн газрын өнөөдрийн (2025.07.23) хуралдаанаар хар тамхи, мансууруулах бодистой холбоотой гэмт хэргийн эсрэг авч хэрэгжүүлж буй арга хэмжээний талаар мэдээллийг сонсож, танилцжээ. Улмаар дараах шийдвэрүүдийг гаргасан байна. 

-УИХ-аас 2002 онд баталсан Мансууруулах эм, сэтгэцэд нөлөөлөх бодисын эргэлтэд хяналт тавих хяналт тавих тухай хуулийн шинэчилсэн найруулгыг шуурхай эцэслэн боловсруулж, наймдугаар сард багтаан Засгийн газарт танилцуулахыг ХЗДХ-ийн сайд болон ЗГХЭГ-ын даргад үүрэг болгосон байна. 

Ингэснээр мансууруулах эм, сэтгэцэд нөлөөлөх бодисын хууль бус эргэлттэй холбоотой гэмт хэргийн шалтгаан нөхцөл, гэмт хэрэг үйлдэгдсэн байдлыг судалж үзэж, гэмт этгээдэд хүлээлгэх хариуцлагыг чангаруулах, бусад объектив талыг харгалзаж, ялгамжтай байдлыг тогтоож, ял шийтгэлийг чангаруулах боломж бүрдэнэ гэж үзжээ. 

-Монгол Улсын хилээр мансууруулах бодис болон сэтгэцэд нөлөөлөх бодисыг хууль бусаар нэвтрүүлэх асуудлыг таслан зогсоох, хязгаарлах зорилгоор Турк, Солонгос, АНУ, ОХУ, Тайланд, Вьетнам болон олон улсын бусад байгууллагуудтай хамтарч ажиллахыг ХЗДХ-ийн сайд болон Гадаад хэргийн сайдад даалгажээ. 

-ЦЕГ-ын Хар тамхитай тэмцэх тасгийг бие даасан, хараат бус байгууллага болгон бэхжүүлэх асуудлыг судалж, саналаа ирэх наймдугаар сард багтаан Засгийн газарт танилцуулахыг ХЗДХ-ийн сайд болон ЗГХЭГ-ын даргад даалгасан байна. 

-Мансуурах донтой иргэдийг эмчлэх, сэтгэлзүйн тусламж үйлчилгээ үзүүлэх, нийгэмшүүлэх чиг үүрэг бүхий төвийг ЭМЯ-ны харьяанд байгуулах асуудлыг судалж, Засгийн газарт танилцуулах, Монгол Улсад хориглосон, хязгаарласан, хяналтад байх шаардлагатай мансууруулах эм, сэтгэцэд нөлөөлөх эмийн жагсаалтыг шинэчлэн батлахыг Эрүүл мэндийн сайдад үүрэг болголоо.

-Мансууруулах эм, сэтгэцэд нөлөөлөх бодисын хэрэглээний тархалтын тандалт судалгааг хийж, бүх шатны боловсролын байгууллагын сургалтын хөтөлбөрт урьдчилан сэргийлэх нөлөөллийн ажлыг зохион байгуулахыг Эрүүл мэндийн сайд, Боловсролын сайд, ХЗДХ-ийн сайд, Нийслэлийн Засаг дарга нарт даалгалаа. 

-Хүүхэд залуучуудын чөлөөт цагийг зөв өнгөрүүлэх чиглэлээр соёл, спортын үйл ажиллагааг тогтмол зохион байгуулахыг ССАЖЗ-ын сайд болон аймаг, нийслэлийн Засаг дарга нарт үүрэг болгожээ. 

-Монгол Улсад ургадаг мансууруулах бодис, сэтгэцэд нөлөөлөх ургамлын тархцыг хумьж, бүрэн устгахыг үүрэг болголоо.