Шүүх Ц.Санжаачойпэлийг хорих шаардлагагүй гэж шийдвэрлэв

Дүүргийн эрүү иргэний хэргийн хялбар ажиллагааны тойргийн шүүх өнөөдөр /2025.08.21/ Ц.Санжаачойпэлд авсан байсан цагдан хорих таслан сэргийлэх арга хэмжээг үргэлжлүүлэх тухай прокурорын хүсэлтийг хэлэлцсэн ч хүлээн аваагүй байна. Ингэснээр УИХ-ын гишүүн асан Ц.Цэрэнпунцагийн хүү Ц.Санжаачойпэл цагдан хоригдохгүйгээр гадуур шалгагдах болж буй аж.

Түүнийг цагдан хорих таслан сэргийлэх хугацаа наймдугаар сарын 28-нд дуусах бөгөөд энэ өдрөөс эхлэн гадуур шалгагдах болж байгаа юм байна.

Эрүү иргэний хялбар ажиллагааны анхан шатны тойргийн шүүхээс өнгөрсөн долдугаар сарын 23-нд Ц.Санжаачойпэл, Э.Тэмүүлэн, Л.Алтан-Очир нарыг 30 хоног цагдан хорих шийдвэр гаргасан. Харин Ц.Санжаачойпэлийн өмгөөлөгч гомдол гаргаснаар шүүхээс энэ сарын 8-нд түүнийг суллах шийдвэр гаргасан. Дээрх шийдвэрийг прокурор эсэргүүцэж гомдол гаргасныг Дүүргийн эрүү иргэний хэргийн хялбар ажиллагааны тойргийн шүүх наймдугаар сарын 15-нд хэлэлцээд хүлээн авснаар буцаан цагдан хориод байсан юм.

Сануулахад, “Эрэл” группын захирал Б.Эрдэнэбатын хүү Э.Тэмүүлэн, УИХ-ын гишүүн асан Ц.Цэрэнпунцагийн хүү Ц.Санжаачойпэл, Л.Алтан-Очир нарыг өнгөрсөн долдугаар сарын 19-нд “Канте” шөнийн цэнгээний газрын гадаа бусдыг зодож биед нь хүнд гэмтэл учруулсан хэрэгт холбогдсон гэж цагдаагийн байгууллагаас мэдээлж байв.

Энэ хэрэгт холбогдоод байгаа “Таван богд” группын захирал Ц.Баатарсайханы хүү Б.Амарсайхан хилээр гарсан тул орж ирэнгүүт нь цагдан хорих шийдвэр хүчинтэй гэж мэдээлсэн юм.