Архи уухын тулд хүн хөнөөсөн бололтой

Өнгөрч буй долоо хоногт гэмт хэргийн гаралт ердийн үеэс доо­гуур байсанд цагдаагийн албан хааг­чдад дуудлага бага иржээ. Гэхдээ ноцтой гэмт хэргийн дуудлага үе үе бүртгэгдэж, цаг­даа­гийн албан хаагчид газар дээр нь асуудлыг шийдэж ажилласан гэнэ. Тухайлбал, Баянзүрх дүүр­гийн 13 дугаар хорооны "Алтан тэвш АОС"-ын гадна талбайд 29 настай эмэгтэй гадны нөлөөтэй нас барсан тохиолдол бүртгэгдсэн байна. Хэргийг дүүргийн цагдаа­гийн хэлтэс шалгахад Багануур дүүргийн харьяат 34 настай эрэг­тэй Ч гэх нэгэн үйлдсэн нь тогтоогджээ. Тэрээр хохирогчийг зүс таних бөгөөд архи уух мөнгө хайж явахдаа ийн танилаа араас нь хоолойг нь боож хөнөөсөн байна.

Долоо хоногийн лхагва гаригт автобусны засварчин ажлаа гүй­цэт­гэж байхдаа автобусанд даруулж нас барсан тохиолдол гарсан. Сонгинохайрхан дүүргийн 20 дугаар хороо "Тэнүүн буянт" компанийн засварчин Б хөдөлмө­рийн аюулгүй байдал хангаагүйн улмаас амь насаараа хохирчээ. Тэрээр тус компанийн автобусны засварын ажлыг эрхэлдэг бөгөөд 27 настай байсан юм бай­на. Хэрэг засварын цехэд гарчээ. Тодруулбал, "DAEWOO" маркийн атобусыг засварлаж байтал дээ­рээс нь унаж Б газар дээрээ нас барсан байна. Хэргийг дүүргийнх нь цагдаагийн хэлтэс шалгаж эхэл­сэн гэнэ. Мөн пүрэв гаригт Сүхбаа­тар дүүргийн нэгдүгээр хорооны нутаг дэвсгэр Замын цагдаагийн газрын зүүн талын "МTD" конст­ракшны барьж байгаа барилгын подвальд Сэлэнгэ аймгийн харьяат иргэн Ш нуруундаа зүсэгдсэн шарх­тай нас барсан байжээ. Талийгаач 36 настай бөгөөд одоогоор эзэн холбогдогчдыг тогтоогоогүй байгаа аж. Хэргийг Сүхбаатар дүүргийн цагдаагийн хэлтэс шалгаж байна.

Халаасны хулгайн гэмт хэрэг өмнөх долоо хоногуудыг бодвол багассан ч орон байрны хулгай нэмэгдэх хандлагатай байж. Тодруул­бал, Хан-Уул дүүргийн 14 дүгээр хорооны Өлзийт хороололд амьдардаг иргэн Ю-гийн гэрээс зургаан цэнгийн алтан бөгж, дөр­вөн цэнгийн алтан ээмэг, дөрвөн цэнгийн монетон бөгж, 200 мянган төгрөгтэй жижиг сейф алдагдсан байна. Бас Баянгол дүүргийн 6 дугаар хорооны иргэн Б нь "Өчигдөр шөнө танилцаад хамт архи ууж хоносон залуу гэрээс эд зүйл хулгайлаад явсан байна" гэж мэдээлсний дагуу шалгахад "Acer" иж бүрэн компьютер "Nokia" гар утас зэргийг иргэн А хулгайлсныг илрүүлжээ.

Л.ТӨР