Хэрэглэгч мэддэггүй байх нь хэнд ашигтай вэ

Үүрэн холбооны оператор компаниуд янз бүрийн урамшууллаар хэрэглэгчиддээ бэлэг барьдаг. Иргэд хөнгөлөлттэй гэхээс илүү үнэгүй гэсэн сонголтонд илүү хошуурдаг. Харин ярианы тарифын хувьд аль болох хямд байх хэрэгтэй гэж үздэг. Тэр ч утгаараа нэгэн хэрэглэгч Б Скайтелийн дараах төлбөрт дугаараа сэргээн барихаар шийджээ. Хоёр жилийн хугацаанд бариагүй хуучин дугаараа дахин сонгож өмнөх төлбөр болох 70 мянган төгрөгийг тушаагаад авсан аж. Учир нь бага насны хүүхэдтэй бөгөөд өвдөх зэрэг асуудал гарвал аль болох хямд үнээр холбоо барих боломжтой хэмээн скайтелаа барихаар шийджээ. Харин тиллер түүнд дугаарыг нь өгөхдөө нэг сар үнэгүй интернэт ашиглах урамшуулалтай гэдгийг хэлсэн байна.

Ийнхүү хэрэглэгч Б нь интернэт орчноор аялж сурчээ. Гэтэл нэг сарын хугацаа нь дуусах хараахан болоогүй байх үед тэрээр хэрэглээнийхээ төлбөрийг шалгатал 152 мянган төгрөг болсон байлаа. Улмаар скайтелийн оператортой холбогдож лавлавал үнэхээр интернэтийн төлбөр нь 152 мянган төгрөг, харин ярианы төлбөр нь 18 мянган төгрөг гарсан гэдгийг дуулгав.

Ингээд тухайн хэрэглэгч бидэнд хандсан юм. Энэ бол шударга бус үйлдэл гэдэг ойлголттой ирсэн түүний тайлбарыг сонсоод дараах дүгнэлтэд хүрлээ.

Хэдийгээр интернэт эрчтэй хөгжиж байгаа хэдий ч энэ нь хүн бүр мэддэг болсон гэсэн үг биш юм. Ялангуяа ухаалаг утас өдрөөс өдөрт өөрчлөгдөн шинэчлэгдэж, улам ухаалагжих болсон. Ийм үед эрхэм хэрэглэгчиддээ зориулж хэрэглээ бүрт нь дэлгэрэнгүй, тодорхой зөвлөгөө, тайлбар мэдээллийг өгч байх нь нэн чухал болжээ. Тухайлбал, дээрх жишээний хувьд дугаараа сэргээж утсаараа интернэт ашиглах үедээ автомат тохиргоог нь хаалгаагүйн улмаас дата нь ачааллаж төлбөр гарсан байж. Тэрээр дунд эргэм насны хүн болоод ч тэр үү үүнийг мэдэхгүй учраас үнэгүй гэж итгэсэн хэрэглэгч интернэтэд чөлөөтэй орж байв.

Нөгөө талаар ийм тохиргоо хийлгэх ёстой гэдгийг нь тухайн үед үйлчилсэн тиллер нь зөвлөж, хэлж өгөөгүй, мэддэг эсэхийг лавлаагүйн улмаас хэрэглэгч хохирсон гэж үзэж болно. Тэгэхээр энэхүү асуудлыг хэрхэн шийдэх нь хоёр талынхны харилцан тохиролцон шийдэх хэрэг болов. Хариуцлагыг хариуцлага алдсан тал хүлээх үүрэгтэй.

Дан ганц скайтел бус бүх үйлчилгээний байгууллагууд энэ мэтийн наад захын зөвлөгөө, зааврыг өгч байх нь хэрэглэгчдэд төдийгүй байгууллагын үйл ажиллагаанд ч чухал нөлөөтэй болохыг анхаарах ёстой. Хэрэглэгчийг хаан гэж өргөмжилдөггүй юм аа гэхэд хэрэгтэй мэдээллийг нь өгч хэвшье.

Ю.Халиун