БНХАУ-ын эдийн засгийн удаашрал нүүрсний үнэд нөлөөлж байна

БНХАУ-ын эдийн засгийн өсөлт удааширч үүнийг дагаад олон салбарт удаашрал үүсэж эхлээд байна. Эдгээрээс хамгийн түрүүнд өртөж байгаа салбар бол уул уурхай тэр дундаа нүүрсний үнэ, эрэлт ч эрс багасч эхлээд байна. Үүний улмаас нүүрс олборлогч компаниуд томоохон алдагдал хүлээж, ажилчдаа хоморголон халах буюу үйлдвэрлэлээ багасгаж, зарим нь үүдээ хааж эхлээд байгаа гэнэ.
БНХАУ-ын Нүүрсний үйлдвэрлэлийн ассоциацийн мэдээлснээр цаашид ч энэхүү ашигт малтмалын үнэ буурах гэнэ. Одоогийн байдлаар 5500К маркийн нүүрс Хятадын “The Bohai-rim Steam-coal Price Index” индекст тонн нь 611 юанийн ханштай байгаа нь өнгөрсөн жилийн мөн үеийнхтэй харьцуулахад 22 хувиар бага гэсэн үг юм.

Тус улсын бирж дээр хувьцаагаа арилждаг нүүрс­ний 39 том компанийн удирдлагуудын мэдээлснээр энэ салбарын ашиг сүүлийн үед эрс буурсан гэнэ. Тухайлбал эдгээр компанийн 80 хувь нь өнгөрсөн онд алдагдалтай ажиллажээ. БНХАУ-ын Статистикийн газрын мэдээллээс үзэхэд энэ оны 1-4 дүгээр сард нүүрсний томоохон компаниудын ашиг дунджаар 43.6 хувиар буурч, 23 хувь нь алдагдал хүлээжээ. Гэтэл өнгөрсөн онд дөнгөж 18 хувь нь алдагдалд орж байсан юм.

Х.Төгөл