АНУ-д 20 мянган хүүхдийн амь нас юуны учир гаргуунд гарав

АНУ-д өдөр бүр таван хүүхэд харгис эцэг эхийнхээ зодуурыг даалгүй амь насаа алддаг. Энэхүү үзүүлэлтээр Америк орон хөгжингүй орнууддаа толгой цохидог байна. Олон улсын мөрдөн байцаах Стрингерийн тов­чооны сайн дурынхны цуг­луулсан “Америкийн гэр бүлийн алан хядах ажил­лагаа” баримтыг саяхан олонд дэлгэжээ.

Тус улсад жил бүр зургаан сая хүүхдийг хүчирхийлсэн тухай 3.3 сая мэдээлэл ирдэг байна. Ялангуяа насанд хүрээгүйчүүдэд гаргадаг нийтлэг гэмт хэрэгт тэдний амьдрал, ашиг сонирхлыг тоодоггүй (78.3 хувь) гэсэн асуудал ордог аж. Харин удаах байруудад биеийн хүчирхийлэл 17.6, бэлгийн хүчирхийлэл 9.2, сэтгэлзүйн дарамт 8.1 хувиар ордог гэнэ. Үүний улмаас сүүлийн 10 жилд эцэг эхийнхээ буруутай байдлаас болж Ирак, Афганистанд дайтсан Америкийн цэргүүдээс дөрөв дахин олон хүүхэд амь насаа алджээ.

“Childhelp”-ийн хөгж­лийн захирал Майкл Медоро “Хамгийн аймшигтай нь жил ирэх тусам байдал хүндэрч байна. 1998 оноос хойш манай байгууллага дээрх статистикийг гаргаж байгаа бөгөөд энэ хугацаанд энэ тоо хоёр дахин өссөн” хэмээн мэдэгдсэн байна. “Childhelp” бол гэр бүлийн хүчирхийлэлд өртсөн хү­мүүст туслах ашгийн төлөө бус үндэсний томоо­хон байгууллага юм.

Бэлгийн хүчирхийлэл ч Америкийн гэр бүлд гаарчээ. Мэргэжилтнүүдийн баталж байгаагаар энэ нь орчин үеийн Америкийн шалиг завхай байдалтай холбоотой бус, XIX зууны “соёлын өв” болох хүүхдүүдийг эцэг эхийн эзэмшил гэж үзэж, тэднээр юу хийх нь дур гэж үздэг байсан үзлээс үүдэлтэй гэнэ.

Өнгөрсөн жил “ВВС”-гийн сурвалжлагчид барим­тат судалгаа хийсний үндсэн дээр сүүлийн 10 жилийн дотор АНУ-ын 20 мянган хүүхэд өөрийн гэртээ, гэр бүлийнхээ гишүүдийн гарт өртөж амиа алдсан гэсэн эмгэнэлтэй тоо гаргажээ. Сэтгүүлчид хүүхдүүдэд халд­­­сан энэхүү харгис үйлд­лийг ядууралтай хол­бон тайлбарлаж байв. Гэтэл Америк бол дэлхийн хамгийн өндөр хөгжилтэй орон шүү дээ.

Харамсалтай нь энд олон гэр бүл шаардлагатай тусламж дэмжлэгийг хүрт­дэггүй, хүүхдүүдийг тө­рөөс хамгаалж чаддаггүй аж.

Сургууль дээр ч байдал тун эвгүй. Уурласан багш нар сахилгагүй хүүхдүүдтэй өөрсдөө учраа олохын оронд шууд цагдаа дуудаж байх жишээтэй.

Тухайлбал Альбуркерк хо­тод долоохон настай хүүг цагдаа нар хичээлээс нь гавлаж гарсан түүх бий. Энэ нь хичээлийн үеэр анги дотуур гүйж, багш руугаа чавхаар харваснаас болсон баривчилгаа гэнэ. Бас нэг этгээд баримт дур­дахад найман настай Эвелин Таури хэмээх охин хайртай хүүхэлдэйн кино­ныхоо баа­тар үнээний зурагтай ноосон цамц өмсөөд хичээлдээ ир­жээ. Гэтэл багшид нь энэ үнээ таалагдаагүй бөгөөд бяц­хан охин ч дуртай цамцаа өмсөхийн төлөө тэмцэж эхэлсэн байна. Энэ явдал хэв журам сахиулагчдыг дуудаж, Эвелинийг насанд хүрээгүйчүүдийн шорон руу илгээснээр дуусчээ.

АНУ-ын боловсролын төсөв жил ирэх тусам ба­гасч, түүнийгээ дагаад сурган хүмүүжүүлэгчдийн мэргэж­лээ дээшлүүлдэг байдал ч мууджээ.

Үүнээс болж сур­гуулийн удирдлагууд хүүх­дүүдийг шийтгэхийн тулд цаг­даа, хүч­нийхэнд хандах нь нэмэгдсэн аж.

Харамсалтай нь орчин үеийн Америкт дээрх айм­шигтай зураглал энд тэндгүй гарах болсон ч хэвлэл мэдээл­лийнхэн нь тоохоо больжээ.

Эх сурвалж: Өглөөний сонин