Гадаад руу ажилд зуучлагч 19 байгууллагын эрхийг түдгэлзүүлэв

Гадаадын улс орнуудад гэрээний агуу албан ёсоор хөдөлмөр эрхлэгчдийг зуучлагч байгууллагуудад саяхан шалгалт хийжээ.

Хөдөлмөр, нийгмийн хамгааллын сайдын тушаалаар томилогдсон “Гадаадад хөдөлмөр эрхлэхэд зуучлах тусгай зөвшөөрөлтэй байгууллагуудын үйл ажиллагаанд хяналт, үнэлгээ хийх” ажлын хэсгийн бүрэлдэхүүн сар гаруйн хугацаанд 60 гаруй байгууллагыг шалгажээ. 2017 оны дөрөвдүгээр сарын 03-ны өдрөөс тавдугаар 10-ны өдрийн хооронд Монгол Улсын иргэдийг гадаадад хөдөлмөр эрхлэхэд зуучлах тусгай зөвшөөрөлтэй 66 аж ахуй нэгж, байгууллагын үйл ажиллагаанд хяналт шалгалт хийсэн байна. Хяналт, үнэлгээнд хамрагдсан 66 байгууллагаас 14 байгууллага нь гадаадад хөдөлмөр эрхлэхэд зуучлах тусгай зөвшөөрлийн нөхцөл, шаардлагыг ханган, үйл ажиллагаа явуулж байна.

Харин 33 байгууллагад зөрчил дутагдал илэрсэн тул Мэргэжлийн хяналтын улсын байцаагчийн хугацаатай албан шаардлага хүргүүлээд байна. Ноцтой зөрчил илэрсэн зарим байгууллагын тусгай зөвшөөрлийг тодорхой хугацаанд түдгэлзүүлжээ. Хөдөлмөр, нийгмийн хамгааллын Сайдын 2017 оны есдүгээр сарын 01-ний өдрийн А/137 дугаар тушаалаар хяналт, шалгалтын дүнгээр хангалтгүй үнэлгээ авсан 19 аж ахуйн нэгжийн тусгай зөвшөөрлийг 2017 оны есдүгээр сарын 04-ний өдрөөс 2017 оны арваннэгдүгээр сарын 03-ны өдөр хүртэл хугацаагаар түдгэлзүүлсэн байна.

Тусгай зөвшөөрлийг түдгэлзүүлсэн аж ахуйн нэгж, байгууллагуудын нэрс:

1. Аск Эба ХХК
2. Баян алтан бухт ХХК
3. Би Жи Сервис ХХК
4. Биллихиро ХХК
5. Бюула ХХК
6. Жи Пи Партнерс ХХК
7. Кайкакү ХХК
8. Монжа Интернешнл Эдүкейшн ХХК
9. Нарт Атас ХХК
10. Монфүжи ХХК
11. Монгол стандарт ХХК
12. Сарухай ХХК
13. Си Эс Эм Эм ХХК
14. Трансформер ХХК
15. Ти Ай Партнерс ХХК
16. Тоба маркет ХХК
17. Хар- Од ХХК
18. Эрмэг жигүүр ХХК
19. Эрхэс Очир Эрдэнэ ХХК

Гадаад руу ажилд зуучлуулах иргэд юуг анхаарах вэ?

Гадаадын улс орнууд руу албан ёсоор зуучлуулах хүсэлтэй хүмүүс үйл ажиллагааг нь түдгэлзүүлсэн дээрх байгууллагад хандахгүй байхын дээр аль аль улс руу хэрхэн хөдөлмөрлөж болох вэ гэдэг мэдээллийг хүргэе.

Гадаадын улс орнуудад Монгол улсын иргэдийг ажиллуулна гэх зар сурталчилгаа цахим сүлжээ, хэвлэл мэдээллийн хэрэгслээр ихээр явуулдаг. Ингэхдээ Япон, БНСУ болон бусад улс орнуудад ажиллах хүсэлтэй иргэдийг хурдан шуурхай явуулна хэмээн зар түгээж байгаа тул албан ёсны мэдэгдлийг хүргэж байна.

1. Япон улсад дадлагажигч ажилтны хөтөлбөрт хамрагдах талаар

Одоогоор Япон улсад дадлагажигч ажилтан зуучлах зөвшөөрөлтэй 54 байгууллага байна. Дэлгэрэнгүй мэдээллийг www.mlsp.gov.mn линкээс үзнэ үү.

Иргэн та Япон улсад дадлагажигчаар ажиллахын тулд дараах шаардлагыг хангасан байх ёстой. Хэрэв та:

• 18 нас хүрсэн,
• дадлага олгох мэргэжлээр ажилласан туршлагатай,
• япон хэлний тодорхой түвшний мэдлэгтэй бол Япон улсад дадлагажигч зуучлах эрхтэй байгууллагад хандаж болно.

Зуучлагч байгууллага таныг Япон компанийн ярилцлагад оруулж, болзол хангаж чадвал эрүүл мэндийн үзлэгт оруулна. Эрүүл мэндээр тэнцсэн хүнд Японы компаниас оршин суух зөвшөөрлийг авч ирүүлнэ. Үүний дараа та зөвшөөрлөө Японы ЭСЯ-нд хүргүүлэн визээ хүснэ. Энэ олон шатны ажил зөвшөөрөлтэй байгууллагаас бүрэн хамаардаг тул та сайтар лавлаж тодруулах нь зүйтэй юм.

2. Бүгд Найрамдах Солонгос Улсад хөдөлмөрийн гэрээгээр ажиллах талаар

БНСУ-руу ажилтан илгээх ажлыг Монгол талаас Хөдөлмөр, халамжийн үйлчилгээний ерөнхий газар, Солонгос талаас БНСУ-ын Аж үйлдвэрийн хүний нөөцийн хэрэг эрхлэх газар удирдан зохион байгуулж байна.

БНСУ-д ажиллах иргэнд:

• 18-39 настай байх
• Хорих ялтай эсвэл түүнээс илүү хүнд ялтай гэмт хэрэгт холбогдоогүй байх
• Солонгосоос албадан гаргах буюу тус улсыг орхин явах захирамж гаргуулж байгаагүй байх шаардлага тавигддаг.

БНСУ-д ажиллах иргэдийн бүртгэлийг жилд нэг удаа зохион байгуулж, бүртгүүлсэн иргэдээс солонгос хэлний түвшин тогтоох шалгалт авдаг. Солонгос хэлний шалгалтад тэнцэж, БНСУ-д ажиллах шаардлага хангасан иргэдэд ажил эрхлэх визийг БНСУ-ын ЭСЯ-аас олгодог.