Замын цагдаа хүний амь аврав

Хэнтийн Дэлгэрхаан сумын нутагт байх “Аварга тосон” рашаан сувиллын газар энэ сарын 02-нд гэр бүлийнхэнтэйгээ амарч байсан Д.Энхжин хэмээх 12 настай охин нууранд эрсдэх дөхжээ. Харин түүнийг тухайн үед гэр бүлээрээ амарч явсан НЗЦГ-ын ахмад Г.Баяржаргал аварсан байна. Охин нуурын эрэг дээр жижиг хөвөгчөөр хөвж байгаад салхинд туугдан нуурын гол руу орчихсон аж. Гэр бүлийнхэн нь хий дэмий сандралдахаас өөр зүйл хийж чадахгүй байхад Г.Баяржаргал нуурын гол руу сэлж охиныг аварсан тухай Д.Энхжингийн эмээ Ичинхорлоо ярьжээ.

Тэрбээр “Өөрийнхөө амь насыг эрсдэлд оруулж өрөөлийг аврах хүн тийм ч олон биш. Ийм хүмүүс олон байгаасай. Тэр замын цагдаагийн ахмад Баяржаргал гэдэг хүүд насан туршдаа талархаж явах болно. Юу санасан есөн хүсэл нь биелэх болтугай” гэсэн байна.

Харин Замын цагдаагийн ахмад Г.Баяржаргал “Тухайн үед эрэг дээр олон хүн байсан ч яг охиныг аврахаар зориглоод орчих хүн олдохгүй байсан. Охины ээж, эмээ хоёр нь сандарсан байдалтай яахаа мэдэхгүй байсан учраас би нуур руу орсон. Нуурын гол хүрэхэд нэлээд цуцсан. Гэхдээ хүний амь гээд шүд зуугаад тэсээд охинд хүрч эрэг рүү хөвөгчтэй нь татаж гаргасан. Тухайн үед нэлээд салхитай байсан учраас буцаад эрэг рүү сэлэхэд хүндрэлтэй байсан” гэжээ.

Г.Баяржаргалын хувьд өмнө нь бас нэг хүний амийг гол усны аюулаас аварч байсан нэгэн гэнэ. Мөн Замын цагдаагийн газартаа нэр хүндтэй, сайн алба хаагч болох тухай хамт ажиллагсад нь ярьжээ.