Туркменстаны Ерөнхийлөгч Г.Бердымухаммедовтой уулзлаа

НҮБ-ын Ерөнхий Ассамблейн 70 дугаар чуулганд оролцож буй Монгол Улсын Ерөнхийлөгч Цахиагийн Элбэгдорж өнөөдөр буюу есдүгээр сарын 27-ны өдөр Туркменстаны Ерөнхийлөгч Гурбангулы Бердымухаммедовтой уулзлаа.

Уулзалтын үеэр Туркменстаны Ерөнхийлөгч Гурбангулы Бердымухаммедов хоёр улсын харилцаа амжилттай өргөжин хөгжиж буйд сэтгэл хангалуун байгаагаа илэрхийлж, Туркменистаны соёлын өдрүүд болон хоёр улсын хамтарсан Бизнес Форумыг энэ сарын 22-25-ны өдрүүдэд тус тус зохион байгуулсныг сайшаав.

Ерөнхийлөгч Ц.Элбэгдорж хоёр улсын хоорондын худалдаа, эдийн засгийн харилцааг хөгжүүлэх нөөц боломж их байгааг дурдаж, цаашид эрчимжүүлэх хэрэгтэйг онцлов. Монгол Улс уул уурхай, мал аж ахуйн бүтээгдэхүүнээр баялаг, харин Туркменстан нефть, байгалийн хийн нөөцөөр арвин тул худалдаа, эдийн засгийн салбарт өргөн боломж байгааг дурдлаа.

Мөн талууд хөдөө аж ахуйн салбарын харилцааг хөгжүүлэх талаар судлах хэрэгтэйг онцлов. Тухайлбал Монголоос мах, махан бүтээгдэхүүн экспортлох, Туркменстанаас сайн үүлдрийн мал оруулж ирэх боломж байгааг ярилцав. Түүнчлэн аялал жуулчлалын салбарт хамтран ажиллах, туршлага судлах тухай ярилцлаа.