"Нийслэлийн үйлчилгээний нэгдсэн төв"-ийн үйлчилгээний жагсаалт

“Нийслэлийн үйлчилгээний нэгдсэн төв”-ийн нээлтийн ажиллагаа ёслол төгөлдөр боллоо. Тустөвийг энэ сарын 4-ний өдрөөс туршилтаар Дүнжингарав худалдааны төвд байгуулсан бол өнөөдөр албан ёсны нээлтийн ажиллагаа боллоо. Нээлтэнд Монгол Улсын Ерөнхий сайд Ч.Сайханбилэг, Нийслэлийн Засаг дарга Э.Бат-Үүл тэргүүтэй албаны төлөөлөгчид оролцлоо.

Нээлтийн үйл ажиллагаанд НИТХ-ын дарга Д.Баттулга Нийслэлийн хүрээнд хийж гүйцэтгэж байгаа олон талт ажлуудыг дурдсан бөгөөд тус төвийг нээснээр иргэн төвтэй, нээлттэй төрийн үйлчилгээ бий болж, иргэд Улаанбаатар хотын тухай мэдээллийг шуурхай хялбар авдаг болох төдийгүй албан хаагчдын ажлын байран дахь ашиг сонирхлын зөрчил, эрсдлийг бууруулах арга хэмжээ болж байгаа ажил гэдгийг онцолсон юм.

Нийслэлийн захирагч Э.Бат-Үүл хуран цугласан олонтой мэндчилж, Ерөнхий сайдыг хүрэлцэн ирсэнд талархал дэвшүүллээ. Ингээд тус төвийн үйлчилгээний талаар тодорхой тайлбар өгсөн юм.Тэрээр хэлэхдээ “Зарим иргэд үйлчилгээ аваад нэлээд цочирдож байна гэнэ. Өөрөөр хэлбэл, найман нэрийн барааны үйлчилгээ эрхлэх эрхийг цонхон дээр сууж байгаа ажилтан Б.Бадрал даргын гарын үсэгтэй нь шууд олгоод явуулчихаж. Гэтэл үйлчлүүлэгч “ингээд болоо юм уу” гээд босч чадахгүй суугаад байна гэнэ. Тэгэхээр энэ мэтээр шууд цонхон дээрээсээ буюу теллерээс үйлчилгээгээ аваад шийдүүлэх боломжтой 80 гаруй үйлчилгээ байна.” гэв.

Тус төвөөс үзүүлэх үйлчилгээг гурван төрөлд хуваажээ. Ногоон өнгө бүхий хуудсыг бөглөсөн иргэн шууд буюу газар дээр нь үйлчилгээгээ авах юм. Харин шар өнгөтэй нь богино хугацаанд буюу нэг хоногт үзүүлэх үйлчилгээ. Улаан өнгөтэй хуудас бөглөх бол уг үйлчилгээг урт хугацаанд буюу 2-30 хоногт шийдвэрлэнэ гэсэн ангилалтай аж. Энэ бүхнийг төвийн лавлагаа, мэдээллийн ажилтан иргэдэд тайлбарлаж өгч ажиллаж байгаа юм.

Мөн Хотын захирагч энэ бүгдийг тайлбарлаад “Ерөнхий сайд биднээс шаардаж байна. Одоо улааныгаа багасгаарай гэж. Ер нь улааныг маш бага болгоноо.... Төрийн үйлчилгээг худалдааны үйлчилгээтэй өрсөлдүүлнэ гэсэн бодолтойгоор бид төрийн үйлчилгээний төвөө худалдааны төвийн дэргэд байгуулж байгаа юм” гэдгийг онцолж байв. Ингээд эцэст нь “Э.Бат-Үүлийг дэлгүүрээр ороход хэн ч тоохгүй бол бид зорьсондоо хүрсэн гэж тооцно” гэдгээ илэрхийллээ.

Ингээд нээлтийн тууз хайчлах ёслолын өмнө Монгол Улсын Ерөнхий сайд Ч.Сайханбилэг үг хэлэв. Тэрээр тус танхимд хуран цугласан нийслэлчүүддээ нартай сайхан өдрийн мэндийг хүргэлээ. Төрийн үйлчилгээг иргэд, ААН-үүддээ ойртуулах нь ямар ч Засгийн газрын тэргүүн зорилтын нэг байдаг хэмээн үгээ эхлүүлж, энэхүү ажлыг хийж гүйцэтгэсэн нийслэлийн удирдлагууд, албан хаагчид, хувийн хэвшлийнхэн болон олон улсын байгууллагынханд талархал илэрхийлэв. Тэрээр “Өнөөдөр төрийн үйлчилгээнд цоо шинэ соёл нэвтэрч, цоо шинэ хандлага бий болж байна гэсэн үг. Бидний олон жил мөрөөдсөн ажил маань биелж байгаад сэтгэл их өндөр байна. Бид энэхүү ажлын араас нь залгуулаад манай 167 төрийн байгууллага, яам, агентлагуудаас үзүүлдэг ийм үйлчилгээг цахим хэлбэрээр нийслэлийнхээ үйл ажиллагаатай нэгтгэнэ. Тэгэхээр Нийслэлийн үйлчилгээний нэгдсэн төв маань Төрийн үйлчилгээний нэгдсэн төв болон өргөжих байх гэж бодож байна. Мөн хотоос хүрээгээ тэлж 21 аймагт дэлгэрээсэй гэж хүсч байна.... Бид шинэ он гарсаар хоёрхон долоо хоногийн дотор олон ажлын ард гарч чадлаа. Ингээд хурдан, тэгш, нээлттэй гэсэн зарчмаараа амжилттай ажиллахыг хүсье”гэлээ.

Ийнхүү нээлтийн тууз хайчлах ёслол болсон юм. Албанёсны нээлтийн үйл ажиллагааг “Улаанбаатарын магтаал”-аар өндөрлүүлэв.

Сонирхуулахад тус төвийн анхны үйлчлүүлэгчээр нийслэлийн ХУД-ийн III хорооны иргэн н.Мөнхзул тодорсон бөгөөд түүнд Нийслэлийн Засаг дарга Э.Бат-Үүл дурсгалын зүйл гардуулсан юм.

Нийслэлийн үйлчилгээний нэгдсэн төв нь нэг удаад 180, өдөрт 2880-6480 үйлчлүүлэгч хүлээн авч үйлчлэх хүчин чадалтай бөгөөд өөртөө үйлчлэх танхимтай, хүүхэд саатуулах өрөөтэй. Мөн нотариат, кафе зэргийг байгуулжээ. Анх нээгдсэн өдрөөсөө хойш нийт 5700 иргэн үйлчлүүлснээс өчигдөр гэхэд 1800 орчим тооны иргэд үйлчлүүлжээ. Иргэдийн зүгээс одоогоор санал, гомдол, шүүмж ирээгүй байна.

Тус төвийн үйл ажиллагааны талаар иргэд ам сайтай байлаа. Тухайлбал, Сүхбаатар дүүргийн иргэн Ч.Мөнхжаргал “Би автобусныхаа картыг гээчихсэн юм. Тэрийгээ авах гээд энд ирсэн чинь нээлтэнд нь таарлаа. Сэтгэлд нийцсэн сайхан үйлчилгээ болжээ. Юу л авъя гэнэ, бүхий л юмыг өгчих юм байна. Миний хувьд богино хугацаанд нэг газраасаа бүх юмаа бүтээчихлээ. Банк нь ч энэ дотор байна. Гараад л автобусандаа суучихна. Эхлээд заалаа яаж олох юм бол гэж бодож байтал угтахаасаа эхлээд эелдэг харьцаатай, бүгдийг заагаад өгчихдөг юм байна. Баярлалаа” гэж бидэнд сэтгэгдлээ хуваалцлаа. Мөн өөртөө үйлчлэх өрөөтэй танилцаж яваа иргэд энэхүү төвийн үйл ажиллагааны талаар сэтгэгдлээ хуваалцсан юм. “Бид татварын хөнгөлөлтийн цэнхэр дэвтэр авсан юм. Урьд нь бол хороогоор яваад нааш цааш явах байсан байх, мэдэхгүй юм. Ямартай ч эндээс шууд л авчихлаа. Хамгийн гол нь дүүрэг харгалзахгүй үйлчилж байгаа нь их чухал байна. Бүх юм нэг дор, хүүхэд саатуулах өрөө хүртэл байна энд.” хэмээн О.Болор-Эрдэнэ ярьлаа.

Тус төвийн ажиллах цагийн хуваарийн хувьд, ажлын өдрүүдэд 08:00-20:00, бямба гарагт 10:00-16:00 цагийн хооронд иргэдэд үйлчлэх юм байна. Энэхүү үйл ажиллагааны бас нэгэн давуу тал бол төр, нийслэлийн ажлын ачааллыг тодорхой хэмжээгээр хөнгөвчилж байгаад оршиж байна. Түүнчлэн Цахим уулзалтын өрөөнөөс шууд Хотын захирагчтай ч холбогдож асуудлаа шийдүүлэх боломжтой юм байна.

Эхний ээлжинд үйл ажиллагаагаа ийнхүү нээж буй тус төвөөс иргэд 25 байгууллагын 233 төрлийн үйлчилгээг шуурхай хүлээн авч, хуулийн хугацаанд асуудлаа шийдвэрлүүлэх боломжтой.

-Нийслэлийн Засаг даргын Тамгын газар

-Захирагчийн ажлын алба

-Улаанбаатар Дулаан сулжээ ТӨХК

-Улаанбаатар Цахилгаан түгээх сүлжээ ТӨХК

-Мэдээлэл, холбооны сүлжээ ТӨХК

-Ус сувгийн удирдах газар

-Нийслэлийн Архивын газар

-Нийслийн Аялал жуулчлалын газар

-Нийслэлийн Агаарын чанарын алба

-Нийслэлийн Байгаль орчин, ногоон хөгжлийн газар

-Нийслэлийн Боловсролын газар

-Нийслэлийн Ерөнхий төлөвлөгөөний газар

-Нийслэлийн Мэргэжлийн хяналтын газар

-Нийслэлийн Өмчийн харилцааны газар

-Нийслэлийн Улсын бүртгэлийн газар

-Нийслэлийн Нийгмийн даатгалын газар

-Нийслэлийн Хөдөлмөрийн газар

-Нийслэлийн Нийгмийн халамжийн үйлчилгээний газар

-Нийслэлийн Авто замын газар

-Нийслэлийн Татварын газар

-Нийслэлийн Эрүүл мэндийн газар

-Нийслэлийн Хөрөнгө оруулалтын газар

-Нийслэлийн Соёл, урлагийн газар

-Нийслэлийн Үйлдвэр, хөдөө аж ахуйн газар

-Нийслэлийн Онцгой байдлын газар

Төрийн үйлчилгээний нэгдсэн төвөөс үзүүлж буй үйлчилгээний жагсаалт