Өмгөөлөгч Ц.Баасандорж талийгаач Т.Лхагвасүмбэрэлийн хэрэгт өмгөөлөл үзүүлэхгүй

Байгаль хамгаалагч агсан Т.Лхагвасүмбэрэлийн хэргийн мөрдөн байцаалтын ажиллагаа одоо хүртэл үргэлжилж байна. Уг хэргийг сайтар шалгах үүргийг ЦЕГ-ын дарга Р.Чингис үүрэг болгосон.

Харин талийгаачийн ар гэрийнхэнд өмгөөлөгч Ц.Баасандорж өмгөөлөл үзүүлж байсан юм. Тэгвэл тэрбээр өнөөдрөөс өмгөөллийн үйл ажиллагаа үзүүлэхээ зогсоож байгаагаа өөрийн фэйсбүүкээр дамжуулан мэдэгджээ.

Тодруулбал, өмгөөлөгч Ц.Баасандорж "2015 оны 11-р сараас 2016 оны 2 сар хүртэл 3 сарын хугацаанд байгаль хамгаалагч талийгаач Т.Лхагвасүмбэрэлийн аав хохирогч Төмөрсүхийн өмгөөлөгчөөр ажиллалаа. Ажиллах хугацаандаа Хөвсгөл аймагт очиж ажиллаж, Улсын Ерөнхий Прокурор, Цагдаагийн ерөнхий газрын дарга, Хөвсөл аймгийн прокурорын газар, Хөвсгөл аймгийн цагдаагийн газарт удаа дараа хэргийн зүйлчлэлийг өөрчлүүлэх хүсэлтүүд гаргаж, гэмт хэргийг шалгах ажиллагаанд өмгөөлөгчийн зүгээс хийж болох бүх л ажлуудыг хийж гүйцэтгэлээ.

Хуульчийн эрх зүйн байдлын тухай хууль, Эрүүгийн байцаан шийтгэх хуульд зааснаар өмгөөллийн мэргэжлийн туслалцаа үзүүлсний төлөө нэр бүхий сэтгүүлч, огт харьцаж байгаагүй зарим нэг хүмүүс гүтгэсэн, доромжилсон, илт үндэслэлгүй мэдээ мэдээлэл тарааж нэр хүндэд минь халдаж, доромжилж цаашид ч энэхүү үйл ажиллагаагаа үргэлжлүүлэх болохоо мэдэгдсэн.

Талийгаач Т.Лхагвасүмбэрэлийн хэргийг илрээсэй, гэмт хэрэг хийсэн этгээдүүд баригдаж ял шийтгэлээ хүлээгээсэй гэж хүсч байгаа олон иргэдийн адил өмгөөлөгч миний бие өөрийн чадах зүйлээрээ тусалъя гэсэн сэтгэлээр ямар ч хөлс мөнгө, зардал авалгүй энэхүү хэрэг дээр 3 сарын турш талийгаачийн аав Төмөрсүхтэй хамт ажилласан ба олон нааштай үр дүн гарсан.

Хэвлэл мэдээллийн хэрэгслээр удаа дараа гарсан гүтгэлэг, доромжлол, үүссэн нөхцөл байдалтай холбоотойгоор талийгаачийн аав Төмөрсүхтэй ярилцаж байгаад энэхүү хэрэг дээр ажиллахаас татгалзаж, энэ нь талийгаачийн хэргийг шалгах ажиллагаанд илүү хэрэгтэй гэж үзлээ. Цаашид энэхүү хэрэг дээр ажиллаж байгаа өмгөөлөгч нарын мэргэжлийн үйл ажиллагаанд нөлөөлөх, нэр хүндийг нь гутаан доромжлох, гүтгэх үйл ажиллагаа явагдахгүй гэдэгт итгэж байна. Талийгаачийн аав Төмөрсүх, ар гэрийнхэн болон бусад бүх хүмүүсээс хүлцэл өчье." гэжээ.

Хэдхэн хоногийн өмнө сэтгүүлч Л.Мөнхбаясгалан өөрийн фэйсбүүкээрээ дамжуулан өмгөөлөгч Ц.Баасандоржийн тухай бичсэн байдаг. Тодруулбал, тэрбээр "Т.Лхагвасүмбэрэлийн хэрэгт өмгөөлөгч Ц.Баасандорж өмгөөлөл үзүүлж байгаа цагт энэ хэрэг хэзээ ч илрэхгүй. Энэ нөхөр жирийн сэтгүүлч надаас ч муу ажиллаж байгаа шүү энэ хэрэг дээр..... ард түмний хайр хүндэтгэлийг хүлээсэн Сүмбээ агсаны амь үрэгдсэн хэргийг чин сэтгэлээсээ өмгөөлөх хүнийг олохсон....Нээрээ энэ нөхрийг УИХ-ын гишүүн Оюунгэрэл олж өгсөн гэсэн шүү.... " хэмээн бичсэн нь өмгөөлөгч Ц.Баасандорж ийнхүү өмгөөлөл үзүүлэхээ зогсооход нөлөөлсөн байж болзошгүй.