Зарим эмнэлгийн амьсгалын аппаратыг ХӨСҮТ-рүү шилжүүлжээ

Эрүүл мэндийн яамнаас Цэргийн госпитал, ЭХЭМҮТ, Нэгдүгээр төв эмнэлгээс амьсгалын гурван аппаратыг ХӨСҮТ-ийн Эрчимт эмчилгээний тасагт шилжүүлжээ. Одоо ХӨСҮТ-ийн эрчимт эмчилгээний тасагт улаанбурханаар өвчилсөн 0-9 сартай 21 хүүхэд хэвтэн эмчүүлж байгаа аж.

Албаныхны мэдээлснээр энэ сарын 25-ны байдлаар улсын хэмжээнд улаанбурхан өвчний нийт 17357 тохиолдол бүртгэгдсэн байна. Мөн энэ сарын 15-21-ний долоо хоногт 1366 сэжигтэй тохиолдол мэдээлэгдсэн нь өмнөх долоо хоногийн үзүүлэлтээс 30 орчим хувиар буурсан үзүүлэлтэй гарчээ.

Гэхдээ Говь-Алтай, Баянхонгор, Архангай, Өвөрхангай, Орхон, Дархан-Уул аймаг, Улаанбаатар хотод тархалт өндөр байгаа аж.

Өвчлөл 0-8 сартай болон 15-29 насны хүүхэд, залуучуудын дунд өндөр хэвээр байгаа юм байна.

Өнгөрсөн долоо хоногийн байдлаар ХӨСҮТ-д нийт 2208 өвчтөн хандсаны 77 хувь нь улаанбурхан өвчний эмнэлзүйн шинж тэмдэгтэй, 18 хувь нь хэвтэн эмчлүүлжээ.

Улаанбурхан өвчнөөр өвчлөгсдийн ойрын хавьтлын судалгааг хийж, 160 хүнийг голомтын дархлуужуулалтад хамруулсан байна.