Эмгэнэл

Хэл бичгийн ухааны доктор, дэд профессор, эрдэмтэн, багш, хүүхдийн зохиолч Галсанбалдангийн Ловор

1937 оны 10 дугаар сарын 10-нд одоогийн Сүхбаатар аймгийн Онгон сумын Мэндийн ухаа хэмээх газар төрж, Онгон сумын бага сургууль, Баруун-Уртын дунд сургууль төгсөөд 1957-1961 онд УБДС, 1975-1977 онд ОХУ-ын Москва хотын КНДС /Одоогийн Нийгмийн ухааны Академи/-ийн сэтгүүлчийн салбарыг тус тус дүүргэж Монгол хэл утга зохиолын багш, сэтгүүлчийн мэргэжилтэй болжээ.

Ажлын гараагаа 1961-1965 онд Гэгээрлийн яамны хэвлэлийн хэлтэст утга зохиолын ажилтан, Пионерийн ордонд утга зохиолын дугуйлангийн багш, танхимийн эрхлэгч, 1965-1979 онд Радио телевизийн хүүхдийн нэвтрүүлгийн редакцид редактор, хариуцлагатай редактор, радиогийн утга зохиолын нарийн бичгийн дарга 1979-1988 онд МХЗЭ-ийн Төв Хороо, Хүүхдийн төлөө төв комиссын дэргэдэх “Хүүхэд залуучуудын нэвтэрхий толь”-ийн редакцид зохиогч, редактор, 1988- 1999 онд Радио телевизийн хэрэг эрхлэх газрын ахлах редактор, “Лавлах алба сургалтын төв”-ийн захирал, 1999 оноос “Сурлага” сонины газар редактор, Дорно дахины дээд сургууль, хувийн өмчийн дээд сургууль “Гурван эрдэнэ” багшийн дээд сургууль, Олон Улс Судлалын дээд сургууль болон МУИС-ийн Улаанбаатар сургуулиудад багшаар ажиллаж, улсад 50 гаруй жил алба хашиж байсан.

Аав маань 1956 оноос уран зохиол сонирхож, 1962 онд “Бачит хэрээний баларсан түүх” үлгэр найраглалын ном гаргаснаас хойш “Яргуй”, “Шидэт анги”, “Жимсний хаяг”, “Нэрээ хэлдэг шувуу”, “Хамгийн үнэтэй бэлэг”, “Үгсийн албан”, “Миний цагаан толгой”, “За-андагаар буй заа”, “Их санаачилга”, “Дариганга ардын аман зохиол”, “Монгол туургатны аман зохиолын чуулган”, “Монголын сонин содон утга зохиол”, “Архи идээний дээж”, “Учир мэдэхгүй хүнд ууц бүү тавь”, “Монгол оньсогын уран сайхны онцлог, утга, учир зүй”, “Хүүхэд залуучуудын нэвтэрхий толь” /гурван боть/ зэрэг 60 гаруй ном зохиол туурвижээ.

Д.Нацагдоржийн нэрэмжит шагналт, хүүхдийн зохиолч Д. Содномдоржийн мэндэлсний 70 насны ойгоор МЗЭ, Хэнтий аймгийн Мөрөн сумын засаг даргын тамгын газраас зарласан хүүхдийн зохиолын уралдаанд “Амьтны араншин” хэмээх өгүүллэгийн номоороо 1988 онд, БСШУЯ-наас зарласан хүүхдэд зориулсан уран бүтээлийн уралдаанд “Математик гараа” номоороо 2008 онд тус тус тэргүүн байр эзэлж диплом, өргөмжлөл хүртэж байв.

Түүний “Миний цагаан толгой” номыг 1989 оны шилдэг номоор, 2004 онд “Хүүхдийн номын яармаг 2004” –өөс “Нисдэг муур” зохиолыг шилдэг номоор тус тус шалгаруулж диплом, Хүүхдийн төлөө үндэсний газрын медалиар шагнаж байв.

2007 онд дэлхийн банкнаас хөдөөгийн боловсролыг дэмжих төслийн хүрээнд хүүхдийн зохиолчдын дунд зарласан бүтээлийн уралдаанд түүний “Амьдрах ухаан”, “Монгол угсаатны хүүхдүүд”, “Үлгэрийн орноор аялцгаая” цуврал болон “Хөгжилтэй аялал” зэрэг 17 ном нь шалгарч хөдөө орон нутгийн сургуулиудын номын санг баяжуулахад зохих хувь нэмэр оруулсан байна.

Г.Ловор 2003 онд, “Монгол оньсогийн уран сайхны онцлог, утга учир зүй” сэдвээр хэл бичгийн ухааны доктор / Ph.D/-ын зэрэг хамгаалж, 2005 онд дэд профессор цолтой болжээ.

2004 оноос Улаанбаатар их сургуульд 2014 он хүртэл багшилж байлаа.

2010 оноос 2015 оны хооронд шинэчилж гаргасан “Хүүхэд залуучуудын нэвтэрхий толь” /гурван боть/ танин мэдэхүйн цуврал номуудын хариуцлагатай эрхлэгчээр ажиллажээ.

Оюуны хөгжилд үр бүтээлтэй ажиллаж ирсэн аавын маань хөдөлмөр, зүтгэлийг үнэлж хэвлэл мэдээлэлийн ба радио телевизын тэргүүний ажилтан, Алтан гадас, Хөдөлмөрийн хүндэт медиал, Алтан хүн одон, Ардын хувьсгалын болон бусад ойн медиалуудаар шагнагдаж байсан.

Таны минь шударга зарчимч, ажилч хичээнгүй, нөхөрсөг зан чанар үр ач, хань ижил, найз нөхөд, бидний сэтгэл зүрхэнд үүрд хадгалагдан үлдэх болно.

Талийгаачийн хань, үр хүүхэд, төрөл төрөгсөд, анд нөхөд, шавь нараас