Өмнөговь аймагт хөдөлдөг, дуугардаг “Үлэг гүрвэлийн парк” нээлтээ хийлээ

Аялал жуулчлалыг хөгжүүлэх түшиц газар болгох зорилгоор Өмнөговь аймгийн Даланзадгад суманд Үндэсний соёл амралтын хүрээлэн байгууллаа. Үлэг гүрвэлийн өлгий нутаг гэгддэг тус аймгийн төвд сүндэрлэн боссон энэ бүтээн байгуулалт зургадугаар сарын 1-ний өдрөөс албан ёсоор үүд хаалгаа нээжээ.

-ХЭРМЭН ЦАВААС ОЛДСОН ОЛДВОРУУДЫН БОДИТ ХЭМЖЭЭГ
АЛДАГДУУЛАЛГҮЙ УРЛАН БАЙРШУУЛЖЭЭ-

Өмнийн цэнхэр говь үлэг гүрвэлээрээ Монголдоо төдийгүй дэлхийд алдартай. Гэвч нутгийн ард иргэд соёлын үнэт өв болсон эдгээр үлэг гүрвэлийн моделийг музейд очихоос нааш харах боломжгүй. Олон зуун жилийн настай соёлын өвийг хадгалан, хамгаалах хуулийн дагуу эх өлгийд нь үлдээх нь дэндүү эрсдэлтэй.

Иймд Өмнөговь аймгийн ЗДТГ-аас иргэдийнхээ танин мэдэхүйн боловсрол, нутаг усаараа бахархан бахдах, чөлөөт цагаа зөв боловсон өнгөрөөх Соёлын амралтын хүрээлэнг 10 га талбайд байгуулжээ.

Энд нийт 18 төрлийн үлэг гүрвэлийг Хэрмэн цаваас олдсон олдворуудын төрлийг сонгож, модель болгон хийсэн байна. Ингэхдээ тэдгээрийн бодит хэмжээг алдагдуулалгүй урлан байршуулж, хөдөлгөөн гарсан зүгт хөдөлж, дуу авиа гаргадаг байхаар шийджээ. Эдгээр үлэг гүрвэлийн баримлуудыг БНХАУ-ын олон улсын эрх бүхий компаниар захиалан хийлгүүлж, эх орондоо авчирсан гэв.

Соёл амралтын хүрээлэнгийн бүтээн байгуулалт зөвхөн үлэг гүрвэлүүдийн амьд мэт хөдөлгөөнт баримлуудаар зогсохгүй 4 га газарт говь нутгийг ногоон аймаг болох зорилтын хүрээнд мод тарьж, зүлэгжүүлсэн байна.

Нутгийн иргэд өөрийн эх нутагт хэдэн мянган жилийн өмнө амьдарч байсан үлэг гүрвэлүүдтэй танилцахын зэрэгцээ хөгжмийн хэмнэлээр бүжиглэдэг усан оргилуур, ногоон байгууламж, тоглоомын талбай, дугуйн зам, усан сан, спортын талбай, сонирхолтой гэрэлтүүлгүүдтэй орчинд цагаа өнгөрөөх аж. Энэ бүтээн байгуулалтыг “Говь-Эрдэнэ” ХХК хийсэн бөгөөд орон нутгийн төсвийн хөрөнгийн 8.2 тэрбум төгрөгөөр соёл амралтын хүрээлэнгээ бий болгожээ.

Б.ГЭРЭЛ

СЭТГЭГДЭЛ БИЧИХ