Өвөр Монголын иргэн Р.Цэнгэл хорих ангид хуурай өлсгөлөн зарлав

Одоогоос хэдэн жилийн өмнө хийсэн киноноосоо болж хорих ялаар шийтгэгдсэн БНХАУ-ын ӨМӨЗО-ны иргэн Р.Цэнгэл хуурай өлсгөлөн зарласан тухай мэдээллээ. Болсон явдлыг тодруулбал, 2012 онд “Хоржийлоо” хэмээх кино хийсэн зохиолч, түүхч Р.Цэнгэл, кино найруулагч Х.Бадамрагчаа нараас гадна гурван хүнийг баривчилсан. Ямар шалтгаанаар хорьсон тодорхойгүй гэх уг хэрэгт холбогдсон хүмүүсээс Х.Бадамрагчаа нарын гурван хүнийг хэргийг 2013 оны дөрвөн сарын 15-нд хэрэгсэхгүй болгож, сулласан. Харин Р.Цэнгэлийг өнөөдрийг хүртэл хорьж байгаа.

“Дэлхийн монголчуудын өв сан”-гийн Хүний эрхийн байгууллагын зөвлөх Ч.Мөнхбаяр, Богд хааны ордон музейн тайлбарлагч Г.Ням-Очир нар энэ асуудлыгхөндөж, хүний эрхийг ноцтойгоор зөрчиж байна гэж үзжээ. Хамгийн гол нь Р.Цэнгэл эхнэртэйгээ утсаар ярихдаа, түүнд хилс хэрэг хүлээлгэхийн тулд хээр аваачиж хий буудан айлгаж, эрүүдэн шүүж, эрүүгийн хүнд гэмт хэрэгтнүүдээр дарамтлуулсан гэж хэлсэн байна.

“Хоржийлоо” хэмээх баримтат кинонд 1913 онд Богд хааны зарлигаар Өвөр Монголыг чөлөөлсөн тухай гардаг бөгөөд Г.Ням-Очирын хэлснээр Р.Цэнгэлийг улстөрийн хэрэгт хэлмэгдүүлж байгаа аж.

П.Нандин