Ярилцлагын үеэр тэрбээр "Залуудаа хор шартай хоосонгүй гар зөрүүлчихдэг байлаа. Одоо 50 хүрчихлээ. Юу гэж л зодоон цохион хийгээд явхав дээ. Би чинь бас намын дарга хүн. Тэр тусмаа Ерөнхий сайдаа балбаад байна ч гэж юу байхав" гээд л шар мэдээнд шанаа өгчихөж байх жишээтэй.  Бизнесд төрийн оролцоог нэмэгдүүллээ гэж ярьцгаадаг. Би яг үнэндээ "бизнесийн зүлгийг нь зулгаагаагүй зэрлэгий нь зулгаасан шүү" гэх урьдаас бэлдсэн гэмээр хариулт сошиалаар онцлогдож байх жишээний.             "Сү.Батболдыг оффшорын асуудлаа шалгуул гэж хэлсэн. Тагнуул хууль шалгаж бгаа нь үнэн.  Ц.Анандбазар түдгэлзэж байгаад шалгуулах ёстой гэдэг зарчмын байр сууриа илэрхийлсэн. Буруугүй бол буцаад ороод ирэх хэрэгтэй шүү дээ" гэх мэт товч тодорхой хариултууд шударга ёсны үнэрээ гээгээгүй яваа шүү гэх мессеж.

    Эрдэнэбүрэнгийн усан цахилгаан станц баригдах болсон, Төв цэвэрлэх байгууламж, шинэ нисэх онгоцны буудалтай болсон гээд ярих зүйл ч их байгаа бололтой.  Сонгуулийнхаа сурталчилгааны үеэр"Уул уурхайн 900 гаруй лиценз цуцаллаа.  Бүхэл бүтэн нэг аймгийн нутаг шүү дээ" гээд хашгирахад л алга ташилт нижигнээд л явчих нь эргэлзээгүй.          

  Ууган намын дарга, Ерөнхийлөгчийн сонгуульд нэр дэвшихээр горилж байгаа У.Хүрэлсүх хүчтэй өрсөлдөгч байх нь урьдчилсан бие халаалтаас ийнхүү харагдаж байна. Нөгөө хоёр намаас нэр дэвшихээр горилж буй эрхэмүүдийн бие халаалтын талаар дараа өгүүлсү.  

                                                                                                                                                                                                                  Д.Оюу