"Хийн гар буугаар бусдыг айлган, сүрдүүлсэн этгээдүүдийг баривчилсан"

Хийн гар буугаар бусдыг айлган сүрдүүлсэн хэрэг нийслэлийн Баянгол дүүргийн нутаг дэвсгэрт энэ сарын 1-ний өдөр гарчээ.

Энэ талаар ЦЕГ-ын Хэвлэл, мэдээллийн төвийн ахлах мэргэжилтэн, хошууч Б.Дэлгэрхангайгаас тодруулахад "Тухайн дүүргийн нутаг дэвсгэрт үйл ажиллагаа явуулдаг цэнгээний газрын үүдэнд гар буугаар бусдыг айлган сүрдүүлж, танхайраад байна гэх дуудлага, мэдээлэл цагдаагийн байгууллагад 03:06 цагийн үед ирсэн.

Дуудлагын дагуу тухайн дүүргийн цагдаагийн хоёрдугаар хэлтсийн алба хаагчид шалгалтын ажиллагаа явуулахад 32 настай Э, 26 настай Ө нар дээрх үйлдлийг гаргасныг тогтоосон. Улмаар сэжигтэй этгээдүүдийг шуурхай эрэн сурвалжилж, Сонгинохайрхан дүүргийн нутаг дэвсгэрээс баривчилж, бусдыг айлган сүрдүүлэхдээ ашигласан хийн бууг хураан аваад байна.

Сэжигтэн 32 настай Э өмнө нь хүнийг алах, дээрэмдэх, хүчиндэх гэмт хэрэг үйлдэн ял шийтгэл эдэлж өнгөрсөн оны есдүгээр сард суллагдсан. Харин 26 настай Ө нь эрхэлсэн тодорхой ажилгүй, өмнө нь мансууруулах эм, сэтгэцэд нөлөөт бодис хууль бусаар ашигласан хэргээр шалгагдаж байжээ" гэв.

Хэргийг Баянгол дүүргийн цагдаагийн хоёрдугаар хэлтэст шалгаж байна.