Дэлхийн алдарт зураач З.Церетели Монголд

       Хорьдугаар зууны дүрслэх урлагийн "шарк"-ууд болох П.Пикассо, С.Дали, М.Шагал нартай харилцаж, тэднээс суралцсан Оросын зураач, гүрж гаралт Зураб Церетели нь дэлхий дахинд алдар нэрээ нэгэнт цуурайтуулсан уран бүтээлч билээ. Тухайн үеийн ЗХУ-ын Тифлис хотод 1934 онд мэндэлсэн тэрээр Зөвлөлт, Гүрж болон Оросын зураач, барималч, багш сурган хүмүүжүүлэгч бөгөөд 1997 оноос өнөөг хүртэл ОХУ-ын Дүрслэх урлагийн академийн ерөнхийлөгчөөр ажиллаж буй. Дахин давтагдашгүй 5000-аад бүтээлээрээ дэлхийд нэгэнт танигдсан түүний уран бүтээлийн цар хүрээ том хэмжээний монументал баримлаас уран зураг хүртэлх маш олон төрлийг хамарсан байдаг. Мөн хүүхэдлэг, энгийн шинж чанартай атлаа хүний амьдралын энгийн ахуйгаас авахуулаад сэтгэлийн чанад дахь нарийн нуугдмал шинж чанар бүхий л талыг харуулсан зураасан зургуудаа гүрж ард түмний угсаатны зүйн нарийн судалгаа шинжилгээ, ажиглалтанд үндэслэн туурвисан юм.                           Ид шид, бодит байдлыг хослуулсан мэт эдгээр бүтээлийг үзсэн урлагийн мэлмий нь нээгдсэн урлаг сонирхогч ч бай, анхлан үзэгч ч бай ер нь хэнбугай ч мэргэжлийн уран бүтээлч адил сэтгэл зүрхнийхээ гүнийг тольдох мэт өөрийн гэсэн зүйлсээ олж харах боломжтой. ЗХУ-ын Дүрслэх урлагийн академийн гишүүнээр 1979 онд сонгогдсон З.Церетели нь ЗХУ-ын төрийн шагналыг 1970, 1982, ОХУ-ын төрийн шагналыг 1996, В.И.Лениний нэрэмжит шагналыг 1976 онд хүртэж, 1980 онд ЗХУ-ын Ардын зураач, 1990 онд Социалист хөдөлмөрийн баатар, 1994 онд ОХУ-ын Ардын зураач цолоор шагнуулжээ.