Д.Дорлигжав: Бусдыг эрүүгийн хэрэгт цагдан хорьж шалгадаг явдлыг багасгах хэрэгтэй

Прокурорын байгууллагын удирдах ажилтны нэгдсэн зөвлөгөөн УЕПГ-т эхэллээ. Зөвлөгөөнийг нээж Улсын Ерөнхий Прокурор, Төрийн Хууль Цаазын Тэргүүн зөвлөх Д.Дорлигжав үг хэллээ. Тэрээр хэлсэн үгэндээ “Прокурорын байгууллагын удирдах ажилтны зөвлөгөөн эхэлж байна.

Прокурорын байгууллагаас 2014 онд тавьсан зорилт биелэгдэж байна. 2015 онд шинээр батлагдах хуулийн дагуу нилээд ажил хийх шаардлага гарчээ. Прокурорын хяналтынажлын чанар, үр нөлөө зарим талаар хангалтгүй байгаа аж. Тухайлбал, шүүхээс хэрэг буцах явдал өссөн. Түдгэлзүүлсэн хэргийн тоо нэмэгдсэн бөгөөд үүнд дүгнэлт хийж арилгах шаардлагатай байна. Улаанбаатар хотод шүүхээс олон хэрэг буцаж байна. Прокуроруудын мэдлэг боловсролыг дээшлүүлэхэд чиглэгдсэн практик сургалтыг сайн зохион байгуулах шаардлага урган гарч байгаа юм. Ажилдаа хариуцлагагүй хандсан хэрэг бүртгэгч, мөрдөн байцаагч нартхариуцлага тооцох талаар тууштай арга хэмжээ авах хэрэгтэй. Асуудлыг дээд шатанд нь хүртэл тавих нь зүйтэй. Прокуророос бичиж байгаа эсэргүүцэл даалгаварыг хуулийн заалтын дагуу сайн бичих хэрэгтэй байна. Энэ талаар нилээд алдаа дутагдал оршиж байгааг арилгах хэрэгтэй. Удирдах ажилтан та нөхөд үүнийг нь хянаж, зааварчилж алдааг нь засч, зөвлөж байх хэрэгтэй. Бусдыг эрүүгийн хэрэгт цагдан хорьж шалгадаг явдлыг багасгах хэрэгтэй. Хэргийг бүрэн шалгаж илрүүлэхийн тулд гүйцэтгэх ажлыг хуулийн хүрээнд явуулахад анхаарах хэрэгтэй” гэдгийг онцлон тэмдэглэлээ.

Зөвлөгөөнд прокурорын байгууллагын төв орон нутгийн удирдах 90 гаруй ажилтан оролцож байна.

Зөвлөгөөнөөр аймаг, нийслэл, дүүргийн прокурорын газраас 2014 онд гэмт хэргээс урьдчилан сэргийлэх талаар зохиосон ажил, авч хэрэгжүүлсэн арга хэмжээний талаархи мэдээллийг сонсч, ажилд нь үнэлгээ дүгнэлт өгч байгаа юм.

Ю.Халиун