Мэс заслын аргаар төрсөн гурван сая дахь иргэнд урамшуулал олгоно

Монгол Улс гурван сая дахь иргэнээ хүлээж авахад бэлтгэж байна. Үндэсний статистикийн газраас гаргасан тооцоогоор Монгол Улсын гурван сая дахь иргэн 2015 оны нэгдүгээр сард төрөх гэнэ.

Монгол Улсын Засгийн газрын шийдвэрээр нийслэлийн есөн дүүрэг, 21 аймгаас тус бүр нэг хүүхдийг буюу нийт 30 хүүхдийг гурван сая дахь иргэнээр тодруулах юм. Тэдгээр хүүхдүүдэд орон сууц буюу түүнтэй тэнцэх хэмжээний мөнгөн шагнал, гурван сая төгрөгийн тэтгэмж олгох юм.

Монгол Улсын нэг сая дахь иргэн 1962 оны хоёрдугаар сард төрсөн бол хоёр сая дахь иргэн 1988 онд мэндэлж байжээ.1988 онд хоёр сая дахь иргэн гэж хот, хөдөөд 25 хүүхдийг тодруулж байсан юм байна. Харин 2015 онд төрөх гурван сая дахь иргэнийг тодруулахдаа мэс заслын аргаар төрсөн хүүхдүүдэд гурван сая дахь иргэний урамшуулал олгохгүй гэсэн яриа иргэдийн дунд тарсан. Тэгвэл энэ талаар Статистикийн төв хорооны Хүн ам, орон сууцны тооллогын товчооны дарга А.Амарбал мэдэгдэхдээ, зайлшгүй мэс ажилбарын аргаар төрөх шаардлагатай эх төрсөн бол хүүхдийг нь 3 сая дахь иргэнээр ялгаагүй тодруулах болно гэсэн юм.