Зам тээврийн ослын зарим хэргийг шүүхэд шилжүүлжээ

У.Тэмүүлэн нь 2015 оны 02 дугаар сарын 06-ны өдөр 21 цагийн орчим иргэн У.Уянгын эзэмшлийн “Тоёота Марк-2” маркийн 59-50 УНТ дугаартай автомашиныг жолоодож явах үедээ хүн мөргөж, амь насыг нь хохироосон хэрэг үйлджээ. Тодруулбал, Чингэлтэй дүүргийн 19 дүгээр хорооны нутагт байрлах Тахилтын замд явахдаа тэрээр Замын хөдөлгөөний дүрмийн 9.2-д “Жолооч хөдөлгөөнд аюул, саад бий болохыг мэдсэн үед тээврийн хэрэгслийн хурдыг хасаж, зайлшгүй тохиолдолд зогсоох арга хэмжээ авна” гэсэн заалтыг зөрчсөнөөс явган зорчигч Н.Энхжаргалыг мөргөж амь насыг нь хохироож, ослын газраас зугтаасан байна. Тиймээс Эрүүгийн хуулийн тусгай ангийн 215 дугаар зүйлийн 215.3, 216 дугаар зүйлийн216.2 дахь хэсэгт зааснаар эрүүгийн хэрэг үүсгэн шалгасан бөгөөд энэ хэрэгт тээврийн прокурорын газраас2015 оны 04 дүгээр сарын 01-ний өдөр 112 тоот яллах дүгнэлт үйлдэж хэргийг шүүхэд шилжүүлжээ.

Мөн Н.Отгонбаяр нь 2015 оны 02 дугаар сарын 16-17-нд шилжих шөнө 01:00 цагийн орчим иргэн Ж.Нямжавын эзэмшлийн “Киа Бонго Пронтер” маркийн 98-85 УНЗ дугаартай автомашиныг жолоодож Баянзүрх дүүргийн Товчооны зүүн замдЗамын хөдөлгөөний дүрмийн 9.2-дахь заалтыг зөрчсөний улмаас “Комфорт Импекс” ХХК-ны эзэмшлийн “Норд Бенз” маркийн 49-01 УНЦ дугаартай автомашиныг мөргөж зорчигч М.Балжиннямын биед хүнд гэмтэл учруулсан гэмт хэрэг үйлдсэн. Уг хэрэгт Эрүүгийн хуулийн тусгай ангийн 215 дугаар зүйлийн 215.2 дахь хэсэгт зааснаар эрүүгийн хэрэг үүсгэн шалгаж 2015 оны 04 дүгээр сарын 01-ний өдөр 111 тоот яллах дүгнэлт үйлдэж хэргийг шүүхэд шилжүүлсэн байна.

Ю.Халиун