Олон улсын Моно жүжгийн фестивалийн нээлт болно

Монголын моно жүжгийн хөгжлийн төв "Найрсаг Улаанбаатар" хөтөлбөрийн хүрээнд 2015 оноос эхлэн "ЯЛАГЧДЫН ЦУВАА - УЛААНБААТАР" Олон Улсын Моно Жүжгийн Фестивалийг зохион байгуулж байгаа билээ.

"Ялагчдын цуваа – Улаанбаатар 2016" фестиваль энэ сарын 15-19-ний өдрүүдэд УДЭТ болон Хүүхэлдэйн театрт явагдах ба Польш, Армени, ОХУ, Англи болон Монголын жүжигчид өөрсдийн хамгийн шилдэг үзүүлбэрүүдээ Монголын үзэгчдэд хүргэх юм.

Монодрам буюу нэг хүний жүжиг хэмээх төрөл эртний грекээс эхлэн хөгжиж 1700-аад оны сүүл үес Франц, Германд хүчээ аван ихэд дэлгэрсэн байдаг. Жүжиг эхлэхээс төгсөх хүртэл гол дүрийн жүжигчин нь хэд хэдэн дүрд хувирах, эсвэл үзэгчидтэй, эсвэл ямар нэгэн амьгүй биет, эсвэл хэн нэгэн төсөөллийн хүнтэй, нэг бол өөрийнхөө дотор хүнтэй хөөрөлдөх, ярилцах зэргээр жүжиглэдэг ба гол төлөв сэтгэлзүйн асуудлыг хөнддөг, нарийн мэдрэмж шаардсан, жүжгийн урлагийн нэгэн онцгой төрөл юм.

2014 онд УДЭТ-ын жүжигчин Ц.Баясгалан Олон Улсын Моно Жүжгийн Фестивалиас Гранпри шагналыг анх удаа эх орондоо авчирсан бөгөөд, түүнийг "Би Эдит Пиаф байна", "Парисын Дарь эхийн сүм", "Хайрын виз", "Нууц амраг чинь болъё", "Домогт Ану хатан", "Чөлөөт хос" зэрэг олон жүжиг, дэлгэцийн хэд хэдэн бүтээлээр нь бид таних билээ.

"ЯЛАГЧДЫН ЦУВАА – УЛААНБААТАР 2016" Олон Улсын Моно Жүжгийн Фестивалиар авъяаслаг жүжигчин Ц.Баясгалан болон гадаад орнуудаас хүрэлцэн ирсэн, цуутай 4 жүжигчний шилдэг үзүүлбэрийг нэгэн тайзнаас үзэх ховор боломж наймдугаар сард тохиож байна.

Фестивалийн нээлт энэ сарын 15-ны өдөр УДЭТ-т болохба 16-19-ний өдрүүдэд Хүүхэлдэйн Театрт тоглолтууд тавигдана.

М.Эгшиглэн