С.Баяр, Ч.Сайханбилэг нарыг "дахин" хорихоор шийджээ

Чингэлтэй дүүргийн Эрүүгийн хэргийн анхан шатны шүүхэд Нийслэлийн прокурорын газраас Ч.Сайханбилэг, С.Баяр, Б.Бадрал нарын цагдан хорих таслан сэргийлэх арга хэмжээний хугацааг сунгуулах тухай санал ирүүлснийг өнөөдөр буюу 2018.05.10-ны өдөр Чингэлтэй дүүргийн Эрүүгийн хэргийн анхан шатны шүүх хүлээн авч:

Ч.Сайханбилэг, С.Баяр, Б.Бадрал нарт өмнө авсан цагдан хорих таслан сэргийлэх арга хэмжээг өөрчилж Монгол Улсын хилээр гарахгүй байх хязгаарлалт тогтоох таслан сэргийлэх арга хэмжээ авч тэднийг суллаж, гадуур байцаалт авах шийдвэр гаргаад байсан билээ.

Уг шүүгчийн захирамжид хуульд заасан эрхийнхээ хүрээнд прокуророос Чингэлтэй дүүргийн Эрүүгийн хэргийн анхан шатны шүүхийн Ерөнхий шүүгчид гомдол гаргасныг хүлээн авч хянаад:

С.Баяр, Ч.Сайханбилэг, Б.Бадрал нарын таслан сэргийлэх арга хэмжээг өөрчилсөн шүүгчийн захирамж үндэслэл тодорхойгүй бус гэсэн үндэслэлээр уг шүүгчийн захирамжийг хүчингүйд тооцож, прокурорын гомдлыг хангаж шийдвэрлэлээ.

Иймд С.Баяр, Ч.Сайханбилэг, Б.Бадрал нарыг тус бүрийн цагдан хорих хугацааг дахин нэг сараар сунгасан болно.

Шүүх хуралд дээрх хүмүүсийн өмгөөлөгч нар ирээгүй юм. Хоёр ерөнхий сайд асны асуудлыг дахин шийдэх хуралдаанд тэдний өмгөөлөгчид оролцоогүй болон, шүүхээс өдөр нь суллах шийдвэр гаргасан ч орой нь ийнхүү "дахин" хорихоор шийдвэрлэсэн нь олон нийтийн анхаарлыг татаж байгаа юм.

Г. Хулан