Өнгөрсөн долоо хоногийн баасан, бямба гаригт МАН-ын Зүүний хүчний холбооныхон Эрдэнэтэд нууц уулзалт хийсэн талаар хэвлэлүүд мэдээллээ. Уулзалтад Ерөнхий сайд У.Хүрэлсүх болон Засгийн газрын зарим гишүүн, УИХ-ын гишүүд, төрийн нарийн бичгийн дарга нар, агентлагийн дарга нар, ТӨҮГ-ын дарга нар гээд Зүүн хүчний холбооны дэмжлэгээр албан тушаалд томилогдсон бүхий л хүмүүс оролцсон тухай ч мэдээлэв. Энэхүү мэдээллийн дараа МАН-ын жижигхэн хөөрхөн болжморууд ийм уулзалт болоогүй талаар жиргэж байв. Яригдаж хэлэгдсэн асуудал нь тийм ч таатай биш болохоор юу гэж л тэгсээн асуудлыг ярилцсан юмаа гээд сууж байхав дээ. Мэдээж л улс төр юм чинь.

  Тэд уулзалтаараа 2020 оны сонгуульд М.Энхболд, Су.Батболд, Л.Энх-Амгалан, Ц.Сандуй, Д.Хаянхярваа, Л.Элдэв-Очир нарын гишүүдийг нэр дэвшүүлэхгүй. МАН-ын 27 –ийн бүлэгт 30 хувиас илүү квот өгч болохгүй гэж тохирсон бололтой.

Тэр дундаа УИХ-д MCS компанийг төлөөлдөг Л.Энх-Амгалан, Л.Элдэв-Очир нарыг нэр дэвшүүлж болохгүй гэж хүртэл ярилцсан гэх.

Энэхүү уулзалтын дараа "ЖДҮ"-ийн халуун ам бүлд багтаж чадаагүй "60тэрбум"-ын бүлэглэлийнхэн хэмээгдэн адлагдаж яваа МАН-ын эсэргүүн 27-ч улс төрийн амьдралын зовлон жаргалаа ярьж, сэтгэл сэргэтэл нэг сайхан буу халахаар болсон талаарх мэдээллийг эх сурвалж хэлж байна. Овоо цовоо цолгиун дуутай, бас ч гэж шөрмөстэй байж мэдэх Н.Номтойбаяр, Ж.Мөнхбат нарынх нь дуу ч гарахаа больж, хааяа нэг ухаарлын өнгө аястай үг өгүүлбэр унагаж суухад, хаа очиж Хаян чинь харин хэлэх үгээ хэлж, дуугарах газраа дуугарсаар яваа. Энэ удаагийн  уулзалтыг ч тэрбээр санаачлан зохион байгуулах болсон бөгөөд уулзалтаар тэд хэрхэх тухайгаа ярилцах аж. Үнэхээр дуулгавартай явсаар тойрог ч үгүй, тойрохоо зуруулсан ч юмгүй намтай ч юм шиг, намгүй ч юм шиг  явсаар залхаж гүйцээд байгаа тухайгаа ч тэр нуухгүй байгаа гэнэ. Ийнхүү сонгууль угтсан хаврын улс төрийн далд уулзалтууд  хашааны гадна талд өрнөх хэдий ч, хэвлэлийнхэнд аль хэдийнэ ил болсоор байх бололтой.

Н. Өлзий

СЭТГЭГДЭЛ БИЧИХ