Үндсэн хуульд оруулах нэмэлт, өөрчлөлтийн төслийн хэлэлцүүлэгт төр, нийгмийн зүтгэлтнүүд урилгаар оролцож байна

УИХ-ын чуулганы өнөөдрийн хуралдаанаар Монгол Улсын Үндсэн хуульд оруулах нэмэлт, өөрчлөлтийн төслийн нэг дэх хэлэлцүүлгийг үргэлжлүүлж байна.

Хэлэлцэж буй асуудалтай холбогдуулан УИХ-ын чуулганы нэгдсэн хуралдаанд төр, нийгмийн зүтгэлтэн болон Үндсэн хууль тогтоогчдыг урилгаар оролцуулж байгааг УИХ-ын дарга танилцууллаа.

Тодруулбал, Ардын их хурлын депутат асан, Монголын бурхан шашинтны төв Гандантэгчинлэн хийдийн хамба лам Д.Чойжамц, Ардын их хурлын депутат, УИХ-ын гишүүн, Үндсэн хуулийн цэцийн дарга асан, Хүний эрхийн үндэсний комиссын дарга Ж.Бямбадорж, Төрийн шагналт хөгжмийн зохиолч Н.Жанцанноров нараас гадна Монфемнет үндэсний сүлжээ төрийн бус байгууллагын зөвлөх Д.Сүхжаргалмаа, МҮАН-ын дарга Б.Цогтгэрэл нар чуулганы нэгдсэн хуралдаанд оролцож байгаа юм.

Үндсэн хуульд нэмэлт, өөрчлөлт оруулах тухай хуулийн төслийн нэгдүгээр хэлэлцүүлгийгчуулганаар өнгөрсөн долоо хоногийн баасан гарагт хэлэлцэж эхэлсэн бөгөөд УИХ-ын гишүүд асуулт асуух явцад ажлын цаг дуусч, түр хойшлуулсан юм. УИХ-ын даргын дэргэдэх зөвлөлөөс гаргасан хуваарийн дагуу өнөөдөр чуулган ээлжит бусаар ийнхүү үргэлжлүүлэн хуралдаж байна.