АН-аас УИХ-д нэр дэвшигч нь 100 саяын татвар төлнө

Aрдчилсан намын Үндэсний бодлогын хороо /ҮБХ/-ны ээлжит хурал өчигдөр /2019.11.09/ Төрийн ордны Их танхимд хуралдлаа.

Хурлаар ҮБХ-ны нөхөн сонгуулиар сонгогдсон гишүүдийн бүрэн эрхийг батлах, Улс төрийн зөвлөлийн гишүүний бүрэн эрхийг батламжлах, сонгуульд нэр дэвшигчийн татварын хэмжээ, хугацааг батлах, 2020 оны УИХ-ын ээлжит сонгуульд нэр дэвших хүсэлтэй гишүүдтэй байгуулах гэрээний төслийг хэлэлцжээ.

Ирэх 2020 оны УИХ-ын сонгуульд намаасаа нэр дэвших мандат авахын тулд эхний ээлжинд 100 сая төгрөгийн татвар өгөх саналыг гишүүдийн олонх дэмжжээ. Ингэснээр УИХ-ын 2020 оны сонгуульд АН-аас нэр дэвшигч нь 100 сая төгрөгийг намдаа тушаах ба хэдэн ч хүн дэнчингээ тавих боломжтой аж. Дээрх татварыг намдаа тушаасан ч нэр дэвших эрхээ авч чадаагүй бол намын зүгээс тухайн хүнд улс төрийн дэмжлэг үзүүлэх юм байна.