О.Баасанхүү улстөрийн шийдвэр гаргана гэдгээ мэдэгдэв

УИХ-ын гишүүн О.Баасанхүү өөрийн твиттер хуудаснаа “Би МАХН-ын гишүүн. Гэвч энэ намын нүүр царай болж зурагт хэвлэлээр гарч буй залуус, өөрийгөө намын дарга гээд өргөмжилсөн Хаан бүгд нийлж 4 жил зөвхөн надтай тэмцлээ. Тиймээс улс төрийн шийдвэр гаргахаас өөр аргагүй юм шиг байна. Тэгээд ч тэд ил тодоор МАХН аас дэвшүүлэхгүй гэж байгаа” хэмээн бичжээ. 

УИХ-ын 2016 оны сонгуулиар МАХН-аас О.Баасанхүү парламентад нэг суудал авсан. Гэвч сонгуулиас хойш О.Баасанхүү намынхантайгаа үл ойлголцож, намаасаа хөөгдөх эсэх асуудал хөндөгдсөн.

Учир нь О.Баасанхүү гишүүн 2017 оны арванхоёрдугаар сард Төрийн ордонд МАХН-ын II чуулганыг зохион байгуулсан. Улмаар өөрөө намын даргаар сонгогдсон ч  Улсын Дээд шүүх О.Баасанхүүг МАХН-ын даргаар бүртгэхээс татгалзсан шийдвэр гаргасан билээ. Энэ асуудлаас үүдэн МАХН-ынхан О.Баасанхүүг намаасаа хөөсөн хэмээн мэдэгдэж байсан юм. Гэвч УИХ-ын гишүүн О.Баасанхүү МАХН-ынхантайгаа ойлголцож чадаагүй бололтой цахим хуудсаараа дамжуулан дээрх мэдэгдлийг хийсэн байна.