М.Гантулга: Жилд дунджаар 441 хүн амиа хорлож байна

Ерөнхий Прокурорын Газрын Сургалт, судалгааны төв "Амиа хорлолттой холбоотой анхны суурь судалгаа"-ны дүнг өнөөдөр танилцууллаа.

Судалгааны дүнгээс харахад өсвөр насны хүүхдийн хувьд эцэг, эхийн зүй бус харилцаа, сурган хүмүүжүүлэгчдийн шударга бус харилцаанаас болж сэтгэл гутралд орж амиа хорлосон тохиолдлууд байгаа бөгөөд сүүлийн үед өсөх хандлагатай байгаа учраас холбогдох газрууд анхаарал хандуулах шаардлагатай байна гэдгийг онцолсон юм.

Энэ талаар Судалгааны багийн удирдагч, хууль зүйн ухааны доктор Б.Өнөрмаа "Амиа хорлосон хүмүүсийн үлдээсэн 217 гэрээслэлийг харахад ихэнх нь сэтгэлзүйн хүнд дарамтаа дааж чадалгүй амиа хорлосон болох нь тодорхой байсан.

Ялангуяа өсвөр насныхны амиа хорлолт нь тэдний сэтгэлзүйн тогтворгүй байдалтай холбогдох нь их байна. Өсвөр насныхныг амиа хорлоход хүргэсэн шалтгаан нь гэр бүлийн хүчирхийлэл, үерхэж буй охин хөвгүүнтэйгээ муудалцах, тохиолдлын бэлгийн харилцаанд орох, гэмт хэрэгт холбогдох, эцэг эхийн анхаарал халамж дутмаг зэрэг хүчин зүйлтэй холбоотой байсан" гэв.

Улсын Ерөнхий прокурорын газрын Сургалт, судалгааны төвийн захирал М.Гантулга "Судалгаанаас харахад 10-29 насны хүмүүсийн дунд амиа хорлолт өсч байна. Тиймээс үүнтэй холбогдуулан Засгийн Газар, Хууль Зүй, Дотоод хэргийн яамандхолбогдох саналуудыг хүргүүлсэн.

Мөн БСШУЯ-аас "Бусдыг амиа хорлох" явдлаас урьдчилан сэргийлэх ажлыг ерөнхий боловсролын сургууль болон их дээд сургуульд энэ төрлийн гэмт хэргээс урьдчилан сэргийлэх тухай мэдэгдэл бичиг хүргүүлээд байна" гэв.

Уг судалгаагаар сүүлийн таван жилд амиа хорлосон 2,055 эрүүгийн хэргийг хамруулж үр дүнг нэгтгэсэн байна. Үр дүнг бататгах зорилгоор санамсаргүй түүврийн 400 эрүүгийн хэрэг тус бүр дээр дүгнэлт гаргасан аж.

Нийт судалгааны дүнгээс жилд дунджаар 441 хүн амиа хорлож байна гэсэн дүн гарчээ​. Нийт амиа хорлосон тохиолдлын 1,729 нь эрэгтэй, 326 эмэгтэй байсан бөгөөд эрэгтэйчүүд эмэгтэйчүүдээс 5.2 дахин их амиа хорлосон байна.