Цасанд суусан, шуурганд төөрсөн иргэдийг аварчээ

Цаг агаарын хүндрэлтэй нөхцөл байдлын улмаас өчигдөр нийслэлийн Онцгой байдлын газарт автомашин цасанд суусан, цасан шуурганд иргэд төөрсөн дуудлагуудад шуурхай ажиллажээ. Тухайлбал, Сонгинохайрхан дүүргийн 1 дүгээр хороо, Баянголын ам Бор толгой гэдэг газар хүнд өвчтэй хүн авч явсан автомашин цасанд суусан гэсэн дуудлагыг 13:08 цагт ирүүлснээр нийслэлийн аврах анги 105-ын ээлжийн бүрэлдэхүүн Приус 20 загварын автомашин цасанд суусан байсныг гаргаж,аюулгүй газар хүргэж өгчээ. Сонгинохайрхан дүүргийн 22 дугаар хороо, Шар цэцэг гэдэг газар НЯТТ 103-аас хүнд өвчтөн авч явсан автомашин цасанд суусан гэсэн дуудлага ирүүлснээр нийслэлийн аврах анги 105-ын ээлжийн бүрэлдэхүүнийг очиж гарган аюулгүй газарт хүргэсэн байна. Мөн Төв аймгийн Сэргэлэн сум, 1 дүгээр баг Бөөгийн толгой гэдэг газар 600 гаруй бог малтай малчин 11:00 цагийн үед төөрсөн, ар гэрийн хүмүүс хайгаад олохгүй байна гэсэн дуудлагыг 20:14 цагт иржээ. Багахангай дүүргийн Онцгой байдлын хэлтсийн Гал түймэр унтраах, аврах 80 дугаар ангийн албан хаагчидэрлийн ажиллаааг зохион байгуулан 22:05 цагт төөрсөн газраасаа 17 км орчим зайтай, Сэргэлэн сумын 1 дүгээр баг Үнэгтэй уулын энгэрт иргэн 53 настай, эрэгтэй, 49 настай, эмэгтэй нарыг бээрсэн байдалтай байсныг эсэн мэнд олж аюулгүй газарт хүргэж амь насыг нь авран хамгаалжээ.