Нүхэн гарц дахь "Галерей" хүн бүрт нээлттэй

Нийслэлийн Засаг дарга бөгөөд Улаанбаатар хотын Захирагч С.Амарсайханы үүрэг болгосны дагуу Сүхбаатар дүүргийн 1 дүгээр хороо, Хүнсний 20-ын урд талын нүхэн гарцыг шинэчлэн засварласа билээ.

Нүхэн гарцын засвар, шинэчлэлийн ажлыг Төр, хувийн хэвшлийн түншлэлээр дөрөвдүгээр сарын 25-наас зургаадугаар сарын 25-ны хооронд Улаанбаатар хотын Захирагчийн ажлын алба, “Элит констракшн” ХХК хамтран хийж гүйцэтгэж, ашиглалтад оруулсан юм.

Тус нүхэн гарцыг засч янзлаагүй байхад зарим нэг нь хоноглох газар болгож, үүгээр өнгөрөх хүмүүс нус цэр, тамхины ишээ хамаагүй хаядаг байсан. Тэгвэл нүхэн гарцыг шинээр засч ашиглалтад оруулснаас хойш, энэ байдал үгүй болж, хувь хүмүүс, олон нийтийн байгууллага зүй зохистойгоор ашиглаж эхэлсэн байна. Тодруулбал, хоёр жилд нэг удаа зохион байгуулагддаг “Ulaanbaatar public art week” арга хэмжээний хүрээнд гаргаж байгаа зураач Э.Есүнгэний “No mad” баримтат гэрэл зургийн үзэсгэлэнг энэхүү нүхэн гарцанд дэлгэж иргэд, олон нийтийн хүртээл болгоод байна. Гэрэл зурагт Улаанбаатар хотын өнөөгийн нийгмийн аж байдлыг харуулжээ. Ингэхдээ “Баянхошууны зун” гэрэл зургаар гэр хорооллын нэгэн айлын хашаанд зун ямар налгар, тайван, гэр бүлээрээ аз жаргалтайгаар өнгөрдгийг, “Гурвал” зургаар энгийн, тайван оршихуй айл гэрийн элгэмсүү байдлаар харагддаг гэдгийг нүдэнд харагдаж, сэтгэлд буухаар гэрэл зургийн хальсанаа буулгаснаараа онцлог аж.

Анх 1988 онд энэхүү нүхэн гарцыг барьж байсан ч өдийг хүртэл засвар үйлчилгээ огт хийгээгүй, таазнаас нь ус шүүрдэг, ус зайлуулах худгийн шахуурга ажиллагаагүй болсон, оройн цагаар зорчих хэсэг гэрэлтүүлэггүй, худалдаа, үйлчилгээ эрхлэх зориулалтгүй атал иргэд зөвшөөрөлгүйгээр үйл ажиллагаа явуулж байсан бол өдгөө ийнхүү нийгэмд эерэг хандлага түгээх, олон нийтийн үйл ажиллагаа зохиох, уран бүтээлчид үзэсгэлэнгээ дэлгэж, их хотын иргэд, оршин суугчдад хотын соёлыг түгээж, гоо зүйн боловсрол олгох зэрэг олон өгөөжтэй арга хэмжээнүүдийг зохион байгуулдаг болоод байгаа юм. Цаашдаа бусад нүхэн гарцуудыг ч ингэж засаж янзлаад, олон нийтэд ашигтай талбар болгох гэнэ.