"Шүүхийн мэргэшсэн сэтгүүлч” сургалт болж байна

Өнөөдөр Шүүхийн ерөнхий зөвлөлөөс жил бүр зохион байгуулдаг "Шүүхийн мэргэшсэн сэтгүүлч” сургалт болж байна. Дөрөв дэх удаагийн тус сургалтад өдөр тутмын 8 сонин, үндэсний хэмжээнд эфирээ цацдаг 11 телевиз, 18 сайтын эрэн сурвалжлах, хууль эрх зүй, шүүхийн сэтгүүл зүйгээр дагнан уран бүтээл туурвидаг 37 сэтгүүлч оролцож байна.

Тус сургалтыг нээж ШЕЗ-ийн Гүйцэтгэх нарийн бичгийн дарга Т.Мэндсайхан үг хэлэхдээ "Шүүхийн мэргэшсэн сэтгүүлч” сургалтын зорилгыг шүүх ил тод, нээлттэй байх, сэтгүүлчдээр дамжуулж иргэдэд мэдээлэл хүргэх болон сэтгүүлчдийн эрх зүйн боловсролыг дээшлүүлэхэд хувь нэмрээ оруулах гэж тодотголоо.

ШЕЗ-ийн дарга, Шинжлэх Ухааны Гавьяат зүтгэлтэн, доктор, профессор Н.Лүндэндорж "Шүүхийн мэргэшсэн сэтгүүлч” сургалтын ач холбогдлыг "Үр нөлөө, бүтээмж, хариуцлагыг дэлхий дахинд бүх салбар хэрэгжүүлэхийн төлөө зүтгэж байгаа. Энэ гурвыг бий болгоход мэдлэг чухал нөлөөтэй. Шүүх, хуулийн салбарын мэдээллийг ил тод, нээлттэй өгч байгаа нь та бүхнийг салбартаа үр нөлөө, бүтээмжтэй, хариуцлагатай ажиллахад туслаж байгаа хэлбэр юм” хэмээн дүгнэв.

Тэрбээр Азийн сангаас хийсэн "Авлигын талаархи олон нийтийн ойлголт тогтоох судалгаа”-ны тайланг онцоллоо. Азийн сангаас 2006 оноос хойш авлигын талаарх олон нийтийн ойлголтыг судалж, тайлан гаргадаг. 2006-2014 оныг хүртэл авлигад хамгийн их өртдөг таван байгууллагад иргэд шүүхийг оруулж байсан бол 2015-2017 онуудад шүүх энэ жагсаалтаас гарчээ. Өөрөөр хэлбэл, сүүлийн гурван жилд шүүх засаглалыг авлигаас ангижирсан гэж иргэд үзсэн байна. Шүүхийн шинэтгэл хэрэгжсэн 2015, 2016, 2017 онд авлигад автсан салбаруудын жагсаалтаас шүүх гарсан нь баримттай үр дүн гэдгийг Шүүхийн ерөнхий зөвлөлийн дарга онцоллоо.

Нийслэл дэх эрүү, иргэн, захиргааны хэргийн анхан шатны шүүхийн олон нийттэй харилцах мэргэжилтнүүд сургалтанд хамрагдаж, шүүхээс мэдээлэл авах эрх, сэтгүүлчийн мэргэжлийн үйл ажиллагаа, шүүхийн ил тод, нээлттэй байдлын талаар сэтгүүлчидтэй харилцан санал солилцоно.

Шүүхийн сэтгүүл зүйн үндсийг тавьсан тус сургалт нь шүүхийн ил тод, нээлттэй байдлын бас нэгэн хэмжүүр болохын хувьд шүүх ба олон нийт, хэвлэл мэдээллийн харилцаа, хамтын ажиллагаа, түүнд тулгамдаж буй асуудлуудын талаар уулзалт хэлэлцүүлгийг өрнүүлдэгээрээ онцлогтой. Өнгөрсөн хугацаанд "Шүүхийн мэргэшсэн сэтгүүлч” сургалтад 200 орчим сэтгүүлч хамрагджээ.