"Г.Номуундарийн хэрэгт холбогдсон хоёр этгээдийг эрэн сурвалжлахгүй байна"

Г.Номуундарь охины өмгөөлөгч Р.Булгамаа, О.Чулуунцэцэг болон хүчирхийллийн эсрэг төрийн бус байгууллагын төлөөллүүд мэдээлэл хийлээ.

Гэр бүл хүүхэд залуучуудын газрын хуулийн албаны дарга А.Энхбаатар "Түр хамгаалах байр, хариу үйлчилгээний төв 2017 оны нэгдүгээр сарын 1-нээс эхлэн үйлчилж эхэлсэн. Сүүлийн үед бага насны охидын хүчирхийллийн дуудлага их ирэх болсон. Энэ асуудлаар Гэр бүл хүүхэд залуучуудын газраас стратегийн судалгаа хийсэн. Хамгийн зовлонтой асуудал 2016 оны есдүгээр сарын 1-нээс үйлчилж эхэлсэн ч гэсэн бага насны охидод өмгөөлөгч үйлчилгээ үзүүлдэггүй байж.

2014-2016 онд хүүхдийн хүчирхийлэлд өртсөн хүүхдүүдийн 76.3 хувь нь ээж аавтайгаа амьдардаг байсан. 56.3 хувь нь өөрийнхөө орон байранд хүчирхийлэлд өртсөн. 2018 онд гэрт нь зочлох үйлчилгээг нэвтрүүлнэ. Бүх төрлийн гэмт хэргээс урьдчилан сэргийлэх төвийг нээхээр ажиллаж байна" гэв.

Г.Номуундарь охины өмгөөлөгч, хуульч Р.Булгамаа "Сүүлийн үед анхаарал татаж буй нэг сэдэв бол Г.Номуундарь арваннэгдүгээр сарын 30-ны өдөр өөрийн цахим хуудсаараа хүүхдүүдийн гэмт хэргийн талаар цацсан.

Энэ нь өөрийнхөө нэр төрийг эрсдэлд оруулсан, зоригтой үйлдэл юм. Баасандоржоор ахлуулсан хуулийн баг охины хэрэг дээр ажиллаж байна. Охины хууль ёсны эрхийг хамгаалж түүний аав нь 12 дугаар сард Цагдаа, Хуулийн байгууллагад хандсан.

Гэмт хэргийн нөхцөл байдал бүрэн тогтоогдоогүй байхад, зарим байгууллагууд уг нөхцөл байдалд өөр өөрсдийн таамаглалаар хандаж байсан.

Уг гэмт хэрэгтэй холбоотой Цагдаагийн байгууллагаас ажлын хэсэг гарч ажиллаж байна. Гэтэл ажлын хэсэг уг нөхцөл байдлыг шалгах явцдаа хууль зөрчиж байна. Гэрчийг байцаахдаа өмгөөлөгч нарыг байлцуулаагүй. Тиймээс мөрдөгчид хуулийн дагуу арга хэмжээ авахуулна. Өсвөр насны хүүхдүүдийн дунд хар тамхи нь энгийн хэрэглээ болсон нь энэ хэргээс харагдаж байна.

Монгол Улсын эрүүгийн хуульд хар тамхийг хэрэглэсэн этгээдэд хариуцлага хүлээлгэхгүй байна. Зөвхөн зарсан борлуулсан этгээдэд хариуцлага хүлээлгэж байна. Тиймээс хэрэглэсэн этгээд зүгээр өнгөрсөөр байх уу".

Өмгөөлөгч О.Чулуунцэцэг "Хэрэгт холбогдсон хоёр этгээд байсан гэдэг нь тогтоогдсон. Гэтэл цагдаагийн байгууллага энэ хоёр этгээдийг эрэн сурвалжлахгүй байна. Энэ хоёр хүн Монголд байхгүй гэдэг нь тогтоогдсон. Оргон зайлах магадлал маш өндөр байсан.

Г.Номуундарь охин сэтгэцийн хувьд эрүүл. ЭЕШ-даа маш өндөр оноо авч, их дээд сургуульд орсон байсан. Охиныг бичлэг хийсний дараа хар тамхины газраас ирж шинжилгээ хийсэн. Шинжилгээгээр охин ямар нэгэн мансууруулах бодис хэрэглэдэггүй гэдэг нь тогтоогдсон. Мөрдөн байцаах ажиллагааг оновчтой шуурхай хийхээс түрүүлэн мэдээлэл хийж, прокурорын байгууллага үнэлэлт дүгнэлт өгч байгаа нь эргэлзээ төрүүлж байна " гэв.