Казахстан Улс жил бүр 25 монгол оюутанд сургалтын тэтгэлэг олгоно

Монгол Улсын Ерөнхий сайд У.Хүрэлсүхийн Бүгд Найрамдах Казахстан Улсад хийж буй албан ёсны айлчлалын үеэр Монгол, Казахстаны боловсролын салбарын хамтын ажиллагааны хоёр баримт бичигт гарын үсэг зурагдлаа. Казахстаны талтай олон жилийн турш хийгдэж байсан яриа, хэлэлцээний үр дүнд “Боловсролын баримт бичиг, эрдмийн зэрэг цолыг харилцан хүлээн зөвшөөрөх тухай Монгол Улсын Боловсрол, соёл, шинжлэх ухаан, спортын яам, Бүгд Найрамдах Казахстан Улсын Боловсрол, шинжлэх ухааны яам хоорондын хэлэлцээр”-ийг 2019 оны 10 дугаар сарын 11-ний өдөр Нур-Султан хотноо байгууллаа. 2008 онд байгуулсан хоёр улсын хэлэлцээрийн хүрээнд Казахстан манай улсад жил бүр 5 сургалтын тэтгэлэг олгож байсан бол дээрх хэлэлцээрт нэмэлт, өөрчлөлт оруулснаар жил бүр 25 монгол иргэнд сургалтын тэтгэлэг олгож байхаар боллоо.