Зам тээврийн ослын улмаас хоёр хүн гэмтэж. нэг хүн нас баржээ

Орон нутгийн замд ноцтой осол гарч, хоёр хүн хүнд гэмтэж, нэг хүн нас барсан харамсалтай хэрэг гарчээ.

Тодруулбал, Дундговь аймгийн Дэлгэрцогт сумын гуравдугаар багийн Хөх-Овоо гэдэг газарт Улаанбаатар хотоос Өмнөговь аймгийн Цогтцэций сумын  чиглэлд иргэн Т /31 настай, эрэгтэй/ жолоодож явсан “Норд бенз” загварын том оврын ачааны автомашин, Дундговь аймгийн Хулд сумаас Улаанбаатар хотын чиглэлд иргэн Г /56 настай, эрэгтэй/-ийн жолоодож явсан “Ниссан Аванте” загварын суудлын автомашин /2 зорчигчтой/-тай мөргөлдөж, автомашины төмөр хийцэд хүн хавчуулагдсан тухай дуудлагыг арваннэгдүгээр сарын 23-ны өдрийн 00:45 цагт хүлээн авчээ.

Улмаар аймгийн Онцгой байдлын газрын Эрэн хайх, аврах бүлгийн алба хаагчид хэргийн газарт ажиллаж, Баянзүрх дүүргийн 20 дугаар хорооны харьяат иргэн А /50 настай, эрэгтэй/, Г /52 настай, эмэгтэй/ нарыг эмнэлгийн байгууллагад хүлээлгэн өгч, Сонгинохайрхан дүүргийн 21 дүгээр хорооны харьяат иргэн Г /56 настай, эрэгтэй/ автомашины төмөр хийцэд хавчуулагдаж, нас барсан байсныг гаргаж, цогцсыг цагдаагийн байгууллагад шилжүүлж  өгсөн байна.