Цагдаагийн байгууллагаас "Сар шинэ-2020" арга хэмжээг эхлүүлнэ

Цагдаагийн байгууллагаас "Сар шинэ-2020" арга хэмжээг улсын хэмжээнд явуулахаар төлөвлөжээ. Монголын уламжлалт сар шинийн баяр, амралтын өдрүүдийг угтан гэмт хэрэг, зөрчлөөс урьдчилан сэргийлэх, таслан зогсоох ажил, арга хэмжээг эрчимжүүлэх, шуурхай шалган шийдвэрлэх, иргэд, олон нийтэд холбогдох хууль тогтоомжийг сурталчлан таниулж, эрх зүйн боловсролыг дээшлүүлэх зорилгоор энэ оны 02 дугаар сарын 03-ны өдрөөс 02 дугаар сарын 28-ны өдрийг хүртэлх хугацаанд явуулах юм байна.

Арга хэмжээний бэлтгэл ажлыг хангах, зохион байгуулах талаар Цагдаагийн ерөнхий газрын Тэргүүн дэд дарга, цагдаагийн хурандаа Р.Отгонжаргал өнөөдөр төв, орон нутгийн цагдаагийн газар, хэлтсийн дарга нартай цахим хурал хийж, үүрэг, ажлын чиглэл өгчээ.