Эрүүл мэндийн яам, ХӨСҮТ болон бусад холбогдох албаныхан COVID-19 халдвараас урьдчилан сэргийлэх ажлын явц, нөхцөл байдлын талаар мэдээлэл хийлээ.

ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл:"COVID-19 халдвар сүүлийн 24 цагийн дотор дэлхийн 99 орныг хамарч, дөрвөн улсад шинээр бүртгэгдлээ.

Одоогоор БНСУ, Япон, Иран, Итали болон Испани, Франц, АНУ-д өвчлөл нэлээд эрчтэй тархаж, голомтлох байдлаар гарч эхэлж байна.Өвчин гарч эхэлснээс хойш Эрүүл мэндийн яамнаас гаднын улс оронд зорчихгүй байх зөвлөгөөг өгсөөр байгаа билээ. Харамсалтай манай иргэд өвчлөл гарсан улсад зорчиж байнга хүндрэл учрууж байна.

Мөн өнөөдөр Франц улсаас ОХУ-аар дамжиж гадаад иргэн Монгол Улсад ирсэн тохиолдол байна. COVID- 19 халдвар гаднаас зөөвөрлөгдөн орж ирэх эрсдэл өндөр байна" гэлээ.

ДЭМБ-ын мэргэжилтэн О.Ариунтуяа "Гуравдугаар сарын 7-ны ДЭМБ-ын мэдээллээр СOVID-19 халдварын нийт 101,927 тохиолдол бүртгэгдэж, сүүлийн 24 цагийн дотор дэлхийн хэмжээнд 106 хүн нас барж, нийт нас баралтын тоо 3,486-д хүрчээ.

Харин БНХАУ-д 28 хүн нас барж, 102 хүн шинээр халдвар авсан нь тус улсад дэгдэлт тууштай бууж байгааг харуулж байна. БНХАУ-аас бусад улсад шинэ тохиолдлын тоо 3,633-аар нэмэгдсэн. Үүнээс 1,234 нь Иранд , 778 нь Италид, 483 тохиолдол нь Солонгос улсад бүртгэгджээ.

Мөн Герман, Испани, Швейцар зэрэг улсад хоногт 100-аас дээш тохиолдол шинээр бүртгэгдэж голомтлон тархаж байна. БНСУ-д нийт 178 мянга гаруй хүн лобаротарийн шинжилгээ хийлгэснээс 150 мянгад нь халдвар илрээгүй. Түүнчлэн тус улсад бүртгэгдэж байгаа шинэ тохиолдлын тоо буурч шинээр голомт үүсээгүй байна.

COVID-19 халдварын тохиолдлын тоо дэлхийн хэмжээнд 100 мянга давсан энэ үед Засгийн газар болон нийгмийн бүх давхаргад авч буй арга хэмжээ нь вирусийн тархалтын хурдыг удаашруулан үр нөлөөг нь бууруулж болохыг БНХАУ болон бусад улс орон харуулж байна гэж ДЭМБ-ын байгууллагаас мэдэгдсэн.

Ямар ч улс орны Засгийн газар халдварын тархалтыг нэмэгдүүлэх эрсдэлтэй шийдвэр гаргаж болохгүй гэдгийг анхааруулж байна. Хүн бүр гэр орондоо болон олон нийтийн газарт өөрийгөө болон бусдыг хамгаалах чадвартай гэдгийг ДЭМБ-аас сануулж байна" гэв.

ХӨСҮТ-ийн Тандалт судалгааны албаны дарга А.Амбасэлмаа: Дэлхийн үл хөдлөх хөрөнгийн форум АНУ-ын Лас Вегас хотод болж дэлхийн 60 гаруй орны 6000 гаруй хүн оролцсон. Энэ форумд Монгол улсаас Remax компанийн 24 хүн хоёрдугаар сарын 23-28 хооронд оролцсон байна. Гуравдугаар сарын 3-5 хооронд тус хүмүүс буцаж ирсэн. Гуравдугаар сарын 5-нд ирсэн 5 хүнийг тусгаарлаж байсан. Тусгаарлалтад байхдаа олон улсын форумд оролцсон гэдгээ хэлээгүй. Өчигдөр ирсэн 13 хүнтэй нийлээд нийт 16 хүнийг ХӨСҮТ-д ажиглалтад авлаа. Үлдсэн 8 нь одоогоор ирээгүй. Манай хүмүүстэй хамт хуралд оролцсон Канад улсын иргэнээс коронавирус илэрсэн. Тиймээс тухайн улсаас үүргээ ухамсарлаж хуралд оролцсон хүмүүсийг анхаарна уу гэж мэдээлсэн. Одоогоор ирсэн 16 хүнийг ажиглаж тусгаарласан.

СЭТГЭГДЭЛ БИЧИХ