Их жанжин Д.Сүхбаатарын мэндэлсний 124 жилийн ой болно

Их жанжин Д.Сүхбаатарын мэндэлсний 124 жилийн ой энэ өдрүүдэд тохиож байна.

Ойтой холбогдуулан маргааш буюу 2 дугаар сарын 2-ны өдөр УИХ-ын дарга, МАН-ын дарга М.Энхболд, Ерөнхий сайд Ж.Эрдэнэбат, МАН-ын ЕНБДарга Д.Амарбаясгалан, УИХ-ын гишүүд, Засгийн газрын гишүүд, МАН-ын ажлын алба, намын гишүүд Их жанжны хөшөөнд цэцэг өргөж, хүндэтгэл үзүүлэх аж. Мөн Тусгаар тогтнолын ордонд СТА, Д.Сүхбаатарыг сурталчлагч, судлаач О.Баатарын Сүхбаатар жанжны түүхэн гэрэл зургийн үзэсгэлэн нээгдэх юм.

Мөн 14 цагт Монголын Үндэсний музейд хадгалагдаж байгаа Д.Сүхбаатар, Х.Чойбалсан нарын түүхт түр үзмэрийн үзэсгэлэнг дэлгэх бөгөөд үдээс хойш Д.Сүхбаатар жанжны гэрийн буйранд цэцэг өргөх хүндэтгэлийн арга хэмжээ зохион байгуулах ажээ.

Харин өнөөдөр ойн хүрээнд Зэвсэгт хүчний 2017 оны Цэрэгжлийн гимнастикийн аварга шалгаруулах тэмцээн Их жанжин Сүхбаатарын нэрэмжит ҮБХИС-ийн Биеийн тамир, спорт сургалтын төвд эхэллээ. Тэмцээний нээлтийн ажиллагаанд ЗХЖШ-ын Орлогч дарга, Бригадын генерал Ж.Бадамбазар, ҮБХИС-ийн захирал, Хошууч генерал Я.Чойжамц, ЗХЖШ-ын Сургалтын хэлтсийн дарга хурандаа Н.Гантулга, Биеийн тамир, спортын тасгийн дарга хурандаа Д.Цог-Эрдэнэ, Жанжин Д.Сүхбаатарын зээ охин хатагтай Т.Сүхжаргалмаа “Армийн генерал асан Батын Дорж” сангийн тэргүүн, зээ охин н.Энхмаа болон бусад албаны хүмүүс оролцож, Жанжин Д.Сүхбаатарын хөшөөнд цэцэг өргөн, хүндэтгэл үзүүллээ.

"Цэрэгжлийн гимнастикийн аварга шалгаруулах тэмцээн"-ийг жил бүр уламжлан болгон зохион байгуулдаг бөгөөд энэ талаар Биеийн тамир, спортын тасгийн дарга хурандаа Д.Цог-Эрдэнэ "Үндэсний Батлан хамгаалахын их сургуулийн хувьд Их жанжин Д.Сүхбаатарын нэрэмжит цөөн байгууллагуудын нэг гэдэг утгаараа энэхүү тэмцээнийг зохион байгуулж байгаа нь нэр төрийн хэрэг юм. Д.Сүхбаатар жанжны хувьд цэрэгжлийн гимнастикт онц сайн хүн байсан учраас манай зэвсэгт хүчний алба хаагчдын хувьд бахархал болж явдаг.

Тиймээс ч энэ хүний нэрэмжит "Цэрэгжлийн гимнастикийн аварга шалгаруулах тэмцээн"-ийг зохион байгуулсаар багагүй хугацааг үдсэн байна. Энэ жилийн хувьд 32 байгууллагын 190 гаруй тамирчид өргөн бүрэлдэхүүнээрээ оролцож байгаагаараа онцлог боллоо" хэмээсэн юм. Зэвсэгт хүчний 2017 оны "Цэрэгжлийн гимнастикийн аварга шалгаруулах" тэмцээнээс нийт 25 медальтан төрж, "Зэвсэгт хүчний аварга” хэмээх алдарыг хүртэх юм.

Ю.Халиун