Богдхан уулан дахь зэрлэгшсэн нохдыг устгажээ

Энэ сарын 5-наас 7-ны өдрүүдэд Хот тохижилтын газар, нийслэлийн Байгаль орчны газраас Богдхан уулын дархан цаазат газрын хамгаалалтын захиргаатай хамтран нийт 214 нохой устгажээ. Богдхан уулын амуудад зэрлэгшсэн ноход элбэгшин зэрлэг амьтад барьж, ууланд аялж буй иргэд рүү дайрсан явдал удаа дараалан гарсантай холбогдуулан нийслэлийн Засаг даргаас шуурхай арга хэмжээ авах үүрэг өгчээ.

Богдхан уул нь улсын тусгай хамгаалалттай газар нутаг, бие даасан хамгаалалтын захиргаатай тул байгаль хамгаалал, биотехникийн арга хэмжээг нийслэл хотоос зохион байгуулах үүрэг хүлээдэггүй. Гэвч нийслэлийн иргэдийн аюулгүй байдлыг хангах үүднээс уг арга хэмжээг авсан байна.

Нийслэлийн нутаг дэвсгэрт 2016онд хийгдсэн агнуур зохион байгуулалтын тайлангийн зөвлөмж хэсэгт хот орчимд олноор сүрэглэн явж, зэрлэг амьтдаар хооллодог болсон зэрлэгшсэн ноход устгах ажлыг нэн тэргүүнд хэрэгжүүлэхээр тусгагдсаны дагуу нийслэлийн ногоон бүсийн Их, Бага Баян, Ухаагийн өвөр,Зүрх ууланд устгалын ажлыг өнгөрсөн оны 11, 12 дугаар саруудад зохион байгуулж байсан юм.

Тархац нутаг нь хумигдаж буй зэрлэг амьтдыг хамгаалах зорилгоор нийслэлийн ногоон бүсийн ойд нохой, мууртай аялахгүй, нохой төөрүүлж хаяхгүй, тэжээвэр нохойг сул чөлөөтэй тавихгүй байхыг нийслэлийн Байгаль орчны газар,Хот тохижилтын газраас анхааруулжээ.