"Приус"-т ногдуулсан онцгой албан татварыг буцаан олгохыг дэмжив

Сангийн сайд Б.Чойжилсүрэн Онцгой албан татварын тухай хуульд нэмэлт, өөрчлөлт оруулах тухай хуулийн төслийг өнгөрсөн сарын 31-нд УИХ-ын дарга М.Энхболдод өргөн мэдүүлсэн.

Өнөөдөр энэ хуулийн төслийг УИХ-ын Төсвийн байнгын хорооны хуралдаанаар хэлэлцэв.

Онцгой албан татварын тухай хуульд нэмэлт, өөрчлөлт оруулах тухай хуулиар хос тэжээлт, цахилгаан хөдөлгүүрт болон хийгээр ажилладаг автомашины онцгой албан татварыг 50 хувиар хөнгөлөхөөр болсон юм. Энэ заалтыг тавдугаар сарын 1-нээс эхлэн мөрдөж эхэлсэн.

Өмнө нь онцгой албан татвар огт төлдөггүй байсан эдгээр автомашинд шинэ хуулиар насжилтаас нь хамаарч 375.000-6.675.000 төгрөгийн татвар ногдуулж байна.

Импортын барааг аль боомтоос ачихад ямар хугацаанд Монголд авчирдаг талаарх судалгаа бий. Яагаад Гаалийн ерөнхий газар энэ судалгааг ашиглаагүй юм бэ?

Гэвч манай улсад хамгийн их эрэлттэй хос тэжээлт буюу “Приус” машины хэрэглэгч, борлуулагчдад дээрх заалт ихээхэн хүндрэл учруулсан талаар иргэд, аж ахуйн нэгжүүд гомдол, шүүмжлэл ирүүлжээ.

Түүнчлэн татвар нэмэхээс өмнө захиалсан болон лизингээр авсан “Пруис” автомашины захиалсан, борлуулсан, худалдан авсан талуудын дунд үл ойлголцол үүсэн, гаалиас хугацаандаа автомашинаа авч чадалгүй бөөгнөрөл үүсэх зэрэг асуудал үүссэн байна.

Иймд иргэд, аж ахуйн нэгжийн хүсэлтэд үндэслэн хос тэжээлт, цахилгаан хөдөлгүүрт болон хийгээр ажилладаг автомашинд ногдуулах онцгой албан татварын хэмжээг хуульд заасан хязгаарт багтаан Засгийн газар тогтоох зохицуулалтыг бий болгох зорилгоор Онцгой албан татварын тухай хуульд нэмэлт, өөрчлөлт оруулах тухай хуулийн төслийг боловсруулжээ.

УИХ-ын гишүүн Б.Баттөмөр батлаад удаагүй хуульд дахин гар хүрч байгаа нь УИХ-ын нэр хүндэд халтай. Импортын барааг аль боомтоос ачихад ямар хугацаанд Монголд авчирдаг талаарх нарийн тооцоо, судалгаа бий шүү дээ. Гэтэл яагаад Гаалийн ерөнхий газар энэ судалгааг ашиглаагүй юм бэ гэж асуулаа. Гаалийн ерөнхий газрын газрын Татварын орлогын газрын дарга н.Эрдэнэчимэг “Аль боомтоос ачсанаас хамааран импортын барааг газраар тээвэрлэхэд 32-45 хоногийн хугацаанд Монголд авчирдаг” гэж хариулав.

Санал хураалт явуулахад хуралдаанд оролцсон 6 гишүүн хуулийн төслийг дэмжлээ. Ингэснээр

• Хос тэжээлт,
• Цахилгаан хөдөлгүүрт,
• Хийгээр ажилладаг автомашины онцгой албан татварыг буцаан олгохоор боллоо.

Хэрэв эдгээр автомашины шинээр тогтоосон онцгой албан татварыг төлсөн ч машинаа борлуулаагүй бол тухайн ААН-д татварыг эргүүлэн олгоно. Худалдан борлуулсан бол худалдан авсан талд татварыг буцаан олгохоор боллоо. Дээрх заасан хугацаанд хилээр авто машинаа нэвтрүүлсэн ч татвар төлөөгүй байсан бол төлөхгүй. Хуулийн төслийг энэ сарын 9-нөөс буюу баасан гарагаас эхлэн дагаж мөрдөнө.

Онцгой албан татварын тухай хуульд өөрчлөлт оруулснаар импортын авто машины тоо эрс өсчээ. Өнгөрсөн сарын 29-ний байдлаар хос тэжээлт 320 орчим автомашиныг гаалийн бүрдүүлэлт хийхээр импортлон оруулж ирээд байгаа аж. Энэ тоо өдөр бүр нэмэгдэж байгаа юм байна.

Автомашины насжилт	Цилиндрийн багтаамж (см куб)	Одоо төлж буй татвар (мянган төгрөг)	Шинэ татвар (мянган төгрөг)	Приус гэх мэт хос тэжээлт авто машины татвар (мянган төгрөг)
0-3 жил	1500 см куб хүртэл	725	750	375
	1501-2500	2 175	2300	1 150
	2501-3500	2900	3050	1525
	3501-4500	6525	6850	3425
	4501 ба түүнээс дээш	10 150	14 210	7 105
4-6 жил	1500 см куб хүртэл	1400	1600	800
	1501-2500	2900	3200	1600
	2501-3500	3625	4000	2000
	3501-4500	7 250	8000	4000
	4501 ба түүнээс дээш	10 875	27 200	13 600
7-9 жил	1500 см куб хүртэл	2900	3350	1675
	1501-2500	4 350	5000	2500
	2501-3500	5800	6700	3350
	3501-4500	9425	10 850	5425
	4501 ба түүнээс дээш	13 050	39 150	19 575
10-аас дээш жил	1500 см куб хүртэл	8700	10 000	5000
	1501-2500	10150	11 700	5850
	2501-3500	11 600	13 350	6675
	3501-4500	15 225	17500	8750
	4501 ба түүнээс дээш	18 850	65975	32987.5

Энэ бол дөрөвдүгээр сард УИХ-аас баталсан, Онцгой албан татварын хувь хэмжээ. Харин Засгийн газар шинэ журам батлан дээрх хувь хэмжээнд өөрчлөлт оруулах эрхийг УИХ-ын Төсвийн байнгын хорооноос олголоо.

Хэрэв УИХ-ынчуулганы нэгдсэн хуралдаанаар энэ төслийг баталвал дээрх тоонууд өөрчлөгдөж болзошгүй боллоо.