С.Амарсайхан: Улаанбаатарын утааг 2021 онд 80 хувиар бууруулна

Нийслэлийн агаарын бохирдол энэ жил 50 гаруй хувиар буурсан гэж Нийслэлийн Засаг дарга бөгөөд Улаанбаатар Хотын захирагч С.Амарсайхан өнөөдөр мэдээлэл хийх үеэр мэдэгдлээ. 

Энэ үеэр тэрээр "2020 оны өвөл утааг дахин 30 хувиар бууруулж, ирэх 2021 оны хавар гэхэд Улаанбаатар хотын утаа 80-аас доошгүй хувиар буурсан байх талаар мэдэгдсэн юм. Энэ зун наймдугаар сарын 15-наас есдүгээр сарын 15 хүртэл Улаанбаатар хотын нутаг дэвсгэрт айл өрх бүр зуух яндангаа хөөлөх, засах, гэр орноо дулаалах шаардлагатай байна" гэв. Энэ талаар Засаг даргын захирамж гарсан. Намрын дулаан өдрүүдэд айл өрх бүр өөрсдийн бэлтгэл ажлыг хангах хэрэгтэйг тэрээр санууллаа. 

"Өнгөрсөн хугацаанд бид олон зуун нам даралтын зуухыг цахилгаанаар орлуулж чадсанаар 150 мянган тонн түүхий нүүрсний хэрэглээг бууруулсан. Өнөөдрийн байдлаар манай улсад 5000 гаруй нам даралтын зуух байна. Эдгээр зуухны үйл ажиллагааг цэгцэлснээр дахин 150 мянган тонн нүүрсний хэрэглээг танаж чадна. Цахилгаан дулаан, хийн хэрэглээнд шилжээгүй тохиолдолд түүхий нүүрс түлүүлэхгүй гэсэн захирамж гарсан" гэлээ. 

Мөн "COVID-19"-ийн халдварын нөхцөл байдалд нийслэлд хийж буй ажлыг танилцууллаа. Ариутгал халдваргүйжүүлэлтийг нийслэлд дүүрэг бүрт хийж буйг мэдээллээ. Өнгөрсөн хугацаанд 19 мянган айлын бие засах газар, бохирын цооногийг ариутгал халдваргүйжүүлэлт хийжээ. Тэрээр дэлхийн улс орнуудын хотуудад "COVID-19"-ийн халдварын нөхцөл байдалд авч буй үйл ажиллагаа, хэрэгжүүлж буй арга хэмжээний талаар товч танилцуулав. 

Ирэх зургаадугаар сарын 2-нд Дэлхийн хотуудын захирагч нарын онлайн хурал болно. Үүнд нийслэлийн Засаг дарга оролцох аж.