Ж.Батзандан гишүүн уриалга гаргалаа

УИХ-ын гишүүн Ж.Батзандан өнөөдөр сэтгүүлчдэд мэдээлэл хийлээ. Тэрбээр УИХ-аар 2014 оны төсвийг хэлэлцэж байгаатай холбогдуулан УИХ, Засгийн газрын гишүүдэд хандан уриалга гаргасан. Энэхүү уриалгад "Монгол Улсын гадаад, дотоод өр хэмжээнээсээ хэтэрчихээд байхад УИХ-ын зарим гишүүн өр нэмэх талаар ярьж байгааг эсэргүүцэж байна. Тиймээс Төсвийн тогтвортой байдлын тухай хуульд заасан хэмжээг хэтрүүлэхгүй байх, 2014 оны Төсвийн тухай хуулийг алдагдалгүй батлахыг уриалж байна. Мөн төсвөөс гадуурх мөнгөний урсгалыг зогсоох, нэг улс нэг төсөвтэй байх зарчмыг баримтлах, эдийн засаг хүндрэлтэй байгаа ч 2014 онд сургууль, цэцэрлэг, эмнэлэг барих төсвийг хасахгүй байх, өрх гэрт суурилсан хүүхэд харах үйлчилгээний тухай хуулийг энэ намрын чуулганаар яаралтай баталж, шаардагдах хөрөнгийг улсын төсөвт суулгах, төсвийг захиран зарцуулахтай холбоотой авлига, гэмт хэргийн шинжтэй үйлдлүүдийг холбогдох хууль хяналтын байгууллагад шалгуулж, хариуцлага тооцох хэрэгтэй” гэв.

Б.Тэмүүлэн