"Гадаадад гацсан 12 мянган иргэний ар гэр УОК-т шаардлага хүргүүлнэ"

Хилийн чанад дахь Монголчуудын зөвлөл ТББ болон гадаадад гацсан иргэдийн ар гэрийн төлөөллөөс өнөөдөр мэдээлэл хийлээ. 

Хилийн чанад дахь Монголчуудын зөвлөл ТББ-ын Удирдах зөвлөлийн гишүүн Б.Мөнхдөл "Гадаадад гацсан 12 мянган иргэний гэр бүлийн төлөөлөл УОК-т шаардлага хүргүүлнэ. Түүнчлэн УОК-оос иргэдэд ташаа ойлголт өгч байна. Нэгдүгээрт, гадаадад гацсан 12 мянган монгол хүмүүс эх орноосоо зугтаж яваагүй. Эдгээр хүмүүс гэр бүлээ тэжээх гэж ажил хийхээр түр хугацаанд явсан. Хоёрдугаарт, УОК чадлынхаа хирээр хүмүүсээ татаж байна гэсэн ташаа мэдээлэл өгч байна. Гуравдугаарт манай ТББ-аас Монгол руу нислэг үйлдэх боломжтой гадны агаарын тээврийн компаниудтай холбогдсон. Энэ асуудлыг УОК-т хүргүүлсэн ч хүлээн аваагүй" гэв. 

Хилийн чанад дахь Монголчуудын зөвлөл ТББ-ын нарийн бичгийн дарга Б.Энхгэрэл "Гадаадад гацсан хүмүүсийн нөхцөл байдал маш хүнд байна. Ирж байгаа хүмүүс яг тэр таван шаардлагад нь нийцэж байна уу гэдэг нь бас эргэлзээтэй байна. Ер нь Монгол хүмүүсээ энэ таван шалгуураар алагчлах хэрэгггүй гэж үзэж байна. Гадаадад байгаа оюутнууд манай байгууллага руу хандаж байна. Америкт гэхэд хэрэв хичээл нь цахимаар орвол гадаад оюутнуудыг нутаг буцах шаардлага тавьж байгаа.

Мөн Унгарт сургуулиа төгссөн 78 оюутны тэтгэлэг цуцлагдсан хүнд байдалд ороод байна. Тусгай үүргийн онгоцны нислэгийн тийз маш үнэтэй байна. Нэг гэр бүлийн хоёр хүн гаднаас ирнэ гэвэл дор хаяж 10 сая төгрөг хэрэгтэй. Ирээд бараг нэг сар тусгаарлагдана гэхээр тухайн хүн ажлаа алдах эрсдэлд орж байна.  Хилийн чанад дахь Монголчуудын зөвлөл ТББ-аас УОК-т хөндлөнгийн хяналт оруулна" гэлээ.