Улсын байцаагчийн шийдвэрийг гурван шатны шүүх хэвээр үлдээлээ

АБСОЛЮТ КЭШ ЭНД КЕРРИ” ХХК-д хүний эрүүл мэндэд сөрөг нөлөө үзүүлж болзошгүй, хуурамч хаяг, шошго нааж иргэдийг төөрөгдүүлсэн зөрчил илэрсэн тул Зөрчлийн тухай хуулийн дагуу 10.000.000 төгрөгийн шийтгэл ногдуулан, улсын байцаагчийн албан даалгавар өгчээ.

Тодруулбал, иргэнээс ирүүлсэн гомдлын дагуу Хан-Уул дүүргийн 4-р хороо, Хүннү Молл худалдааны төв байрлах тус хайпермаркетын үйл ажиллагаанд энэ оны тавдугаар сарын 21-ний өдөр төлөвлөгөөт бус хяналт шалгалтыг хийсэн. 

Шалгалтаар тус аж ахуйн нэгж нь “Баярлаа”, “Шэнэхэнкие”, “Монгольские” нэрийн 3 буузыг үйлдвэрлэж, худалдаалах үйл ажиллагаа явуулахдаа хадгалах хугацаа дуусах дөхсөн буузыг шинээр үйлдвэрлэсэн мэтээр хуурамч хаяг, шошго нааж нийтийн хэрэгцээнд худалдаалсан.

Дээрх гурван нэрийн буузыг МХЕГ-ын дэргэдэх ХАБҮЛЛ-д шинжилгээнд хамруулахад гурилын шинэлэг байдал алдагдаж, гадаргуу нь хатсан, гурилан их биет байдал нь язарч хагарсан, буузыг жигнэхэд мах нь хуршинга үнэртэй, “Баярлаа” нэрийн буузанд эмгэг төрөгч Е.coli 5*102 ихгүй байхаас 9*102 их байсан нь 2019 оны 05 дугаар сарын 28-ний өдрийн сорилтын дүнгээр тогтоогдсон тул торгох шийтгэл оногдуулсан аж.

Гэвч "АБСОЛЮТ КЭШ ЭНД КЕРРИ ХХК-" ХХК нь итгэмжлэгдсэн төлөөлөгчөөрөө дамжуулан улсын байцаагчийн шийдвэрийг эс зөвшөөрч, Нийслэл дэх Захиргааны хэргийн анхан шатны шүүхэд нэхэмжлэл гаргасан бөгөөд анхан шатны шүүхийн шийдвэрээр улсын байцаагчийн шийдвэрийг хэвээр үлдээсэн.

Улмаар нэхэмжлэгч Захиргааны хэргийн давж заалдах шатны шүүх болон Улсын дээд шүүхийн захиргааны хэргийн танхимд тус тус гомдол гаргасныг тухайн шатны шүүхийн магадлал, тогтоолоор анхан шатны шүүхийн шийдвэрийг хэвээр үлдээж, нэхэмжлэгчийн гомдлыг хэрэгсэхгүй болгож, улсын байцаагчийн шийдвэрийг хэвээр үлдээсэн байна.